Путин күбрәк ит, балык, яшелчә ашарга тәкъдим итә

Рәсәй Президенты Владимир Путин Липецк өлкәсенә сәфәре барышында кулланучылар кәрзиненең составын яңартырга, аңа күбрәк ит, балык, яшелчәләр кертергә тәкъдим итте.

"Әгәр бу кәрзингә карасак, белгечләр фикеренчә, аның структурасы камилләштерүгә мохтаҗ. Чөнки анда икмәк-күмәч ризыклары зур өлеш алып тора, ә менә яшелчә, җиләк-җимеш, балык һәм ит аз. Шуңа күрә ул, һичшиксез, яңадан каралырга тиеш", - дип белдерде Президент.
Кулланучылар кәрзине составын яңарту башлангычы яңалык түгел, дип искә төшерә "Тhe Bell". Хезмәт һәм социаль яклау министрлыгы аны 2019 ел башында ук сөт продуктлары һәм яшелчә өлешен арттыру ягына карарга җыенган булган.

Минималь кәрзиннең агымдагы еллык составы 2012 елдан бирле үзгәрмәгән. Аңа 290 кг сөт продуктлары, 126,5 кг — икмәк (ярмалар, он һәм кузаклылар), 100 кг бәрәңге, 115 кг яшелчә, 60 кг җиләк-җимеш, 58,6 кг ит, 18,5 кг балык керә.

Минималь хезмәт хакы күләме (МРОТ) исәпләнә торган яшәү минимумы кулланучылар кәрзине составына бәйле. 2020 елның 1 гыйнварыннан минималь хезмәт хакы аена 12 130 сум тәшкил итә.
Чыганак: "Башинформ"