Туган телне белү мөһим

«Башкорт теле һәм әдәбиятының ел укытучысы-2024» төбәкара бәйгедә катнашучы Дурас мәктәбе укытучысы Дилбәр Галимҗанованың девизы – «Туган телне белү мөһим».

«Башкорт теле һәм әдәбиятының ел укытучысы-2024» төбәкара конкурсның беренче туры киләсе атнада Уфада башлана. Хәзер әлеге чарага әзерлек бара. Бәйгедә Чишмә районы данын Дилбәр Галимҗанова яклаячак.

Аның педагогик стажы чирек гасыр тәшкил итә, шуның 20 елын ул Дурас авылы мәктәбендә эшли. Дилбәр Айрат кызы – мавыгучан кеше, белемнәрен даими камилләштерә, һәр эшкә иҗади карашы бар. Шуңа күрә балалар да аңа тартыла.

Аның укучылар белән эшләү тәҗрибәсе һәм үз ысуллары бар.

– Мәгълүматны ятлау бернинди дә нәтиҗә бирми, – дип психолог буларак фикер йөртә Дилбәр Галимҗанова (мәктәптә ул психолог булып та эшли). Чөнки бу файдасыз һәм күңелсез шөгыль. Болай укыганда фәнгә карата нәфрәт барлыкка килә. Күпләрнең шундый хәлгә юлыкканнары, нинди дә булса фәнне укытучы аркасында гына ошатмаганнары булгандыр, мөгаен. Бер генә укытучы да ул урында булырга теләмәс иде. Минемчә, белем бирү һәм үзара җылы мөнәсәбәтләр булдыру аша гына уңай нәтиҗәгә килергә һәм балаларның синең фәнне тирәнтен өйрәнергә теләвенә ирешергә мөмкин. Исем өчен генә эшләргә ярамый, дип уйлыйм, – дип үз фикере белән уртаклашты Дилбәр Айрат кызы.

Аның укучыларының бик күп тапкыр мәктәп олимпиадаларында һәм иҗади бәйгеләрдә җиңүе һәм призер булуы аның хезмәтләренең ачык мисалы булып тора. Һәр ел саен башкорт теле һәм әдәбияты буенча район олимпиадаларында нәкъ аның укучылары тел һәм сөйләм буенча искиткеч белемнәрен күрсәтә. Дилбәр Айрат кызы аларны республика дәрәҗәсенә чыгарырга тырыша.

– Кызлар һәм малайлар үз белемнәрен күрсәтергә, халык алдында чыгыш ясарга, башкалардан тәҗрибә алырга, үз-үзләренә ышанырга, яшьтәшләре белән аралашырга өйрәнәләр. Бу сыйфатлар аларга киләчәктә көчле шәхес булырга ярдәм итәр дип уйлыйм.

Иң мөһиме, туган телне яхшы белү аларга тормышта һәрвакыт кирәк булачак. «Туган тел – халык күңеле һәм аның бизәге ул» дип юкка гына әйтмиләр бит.

Ул безне дөрес булмаган адымнардан туктатучы, хаталарыбызны кисәтүче, безнең белән бергә шатланучы һәм кайгыручы. Бары тик туган тел генә безгә бар нәрсәнең асылын төшендереп бирүче «корал»...