Посёлокта велоузыш үтте

Күптән түгел Чишмә поселогында велоузыш үтте. Анда катнашырга теләүчеләр салым хезмәте алдындагы мәйданга килеп теркәлделәр, ярыш та шул урыннан башланды.

– Велоузышның кайчан, кайда һәм ничәдә булачагын район гәзитеннән укып белдем. Оныкларым белән ел саен катнашам, – дип сөйләде Мәүлидә Шәнгәрәева. – Үткән елда оныгым Әминәгә ярышта иң яшь, ә миңа иң өлкән катнашучы буларак бүләк тапшырдылар. Без актив тормыш алып барабыз: велосипедта Горный һәм Караякуп авылларына барып йөрибез.

Бу көнне биредә нинди генә маркадагы һәм модельдәге велосипедлар юк иде! Катнашучылар да төрле яшьтә булды. Кечкенәләр дүрт тәгәрмәчле велосипедларда узыштылар. Тиеш булганча, сабыйлар әти-әниләре белән бергә катнашты.

Оештыручылар – район хакимиятенең физик культура, спорт һәм яшьләр эшләре буенча комитет һәм Чишмә муниципаль район Советы карамагындагы яшьләр советы чараның ЮХИДИ белән берлектә, сәламәт тормыш рәвешен, гаилә белән ял итүне, шулай ук юл хәрәкәте кагыйдәләрен пропагандалау максатында үткәрелүен билгеләделәр.

Эчке эшләр министрлыгының Чишмә районы буенча ЮХИДИ бүлегенең юл хәрәкәте хәвефсезлеген пропагандалау инспекторы Әлфия Вәлиева чарада катнашучыларны сәламләп уңышлар теләгәннән соң юлларда иминлек буенча инструктаж һәм юл хәрәкәте кагыйдәләре буенча викторина үткәрде. Ярышта катнашучылар стартка кадәр велосипедчыларга кагылган юл хәрәкәте кагыйдәләрен белүләрен раслап тест үттеләр.

Өлкәннәр һәм балалар Ленин – Гыйззәтуллин – Киров – Чернышевский урамнары буйлап үттеләр. Анда катнашу өчен 70 велосипедчы теркәлде, бу үткән елдагы белән чагыштырганда ике тапкырга күбрәк. Катнашучылар колоннасын ЮХИДИ һәм ашыгыч ярдәм машиналары озата барды.

Велоузышта катнашучыларның барысы да истәлекле медальләр белән бүләкләнде. 4 яшьлек Айнур Асаев иң яшь, 85 яшьлек Павел Семахин иң өлкән катнашучы булды. Эллина Собханкулова «Иң актив велосипедчы» номинациясендә бүләк алды, ә велосипедны үзенчәлекле итеп бизәгән Ринат Рәхимовка кубок тапшырылды.