Көнкүреш калдыкларын чыгару өчен килешү төзергә вакыт

Башкортстанның күп фатирлы, шулай ук шәхси йортларда яшәүче халкы, юридик затлар һәм хосусый малтабарлар 2019 елның гыйнварында төбәк операторы белән каты коммуналь калдыклар белән эш итү буенча хезмәтләр күрсәтүгә килешү төзергә тиеш, дип хәбәр итә БР Табигатьтән файдалану һәм экология министрлыгы.

Мондый килешүләрне төзү зарурлыгы Рәсәй Федерациясе Хөкүмәте тарафыннан расланган каты коммуналь калдыклар белән эш итү кагыйдәләрендә күздә тотыла. Килешүләр формасы һәм аларны төзү тәртибе төбәк операторы «Шәһәрне җыештыру буенча махсус автохуҗалык» предприятиесенең рәсми сайтында урнаштырылган (http://sahufa.ru/ тел. 8-800-347-8003 (хезмәтләндерү зонасы – Уфа шәһәре, Архангель, Белокатай, Благовар, Благовещен, Дуван, Иглин, Кырмыскалы, Кыйгы, Кушнарен, Мәчетле, Нуриман, Салават, Уфа, Чишмә районнары).

Исегезгә төшерәбез, 2019 елның 1 гыйнварыннан безнең республика, бөтен ил кебек, каты коммуналь калдыклар белән эш итүнең яңа системасына күчте. Хәзер чүп-чар җыю, ташу, эшкәртү, утильләштерү, зарарсызландыру һәм күмү белән төбәк операторлары шөгыльләнәчәк, ә халык әлеге хезмәтләр өчен билгеләнгән тарифларга ярашлы түләячәк.

Бу эш, барыннан да элек, калдыклар белән эш итүнең заманча, экологик хәвефсез системасын формалаштыруга, рөхсәтсез булдырылган күп санлы чүплекләрне бетерүгә һәм яңалары барлыкка килүне кисәтүгә, шулай ук чүпне сортларга аеру һәм эшкәртү буенча үсеш алган инфраструктура булдыруга юнәлдерелгән.