Спорт белән шөгыльләнү өчен ничә яшьтә булуың мөһим түгел

Программада сәламәтлекне гомуми ныгыту физкультурасы буенча күнегүләр, бассейнга бару, шулай ук ел әйләнәсе саф һавада дәресләр үткәрү планлаштырылган. Бу максатлар өчен барлык кирәк-яраклар, чаңгылар, скандинавия йөреше өчен таяклар, гимнастика келәмнәре һәм бассейн өчен җиһазлар, волейбол туплары сатып алынган.

– Әлеге проект олы яшьтәгеләргә тиешле игътибар бирергә мөмкинлек бирәчәк. Алар сәяхәт итәләр, сәламәтлекләрен ныгыталар. Шуңа күрә, беренче чиратта, өлкән буын кешеләре көнкүреш проблемаларына гына бикләнмәсеннәр, үзләренә игътибар итә алсыннар өчен мөмкинлекләр тудырган республика Башлыгы Радий Хәбировка рәхмәт сүзләрен җиткерәсем килә, – дип билгеләп үтте Чишмә районы хакимияте башлыгы Ришат Мансуров.

Дәресләр атнага ике тапкыр ике сәгать үтә. Курс киләсе елның 30 июненә кадәр дәвам итәчәк.

– Пенсионерлар проект барышында тренерлар ярдәмендә йөзү, шулай ук сәламәтлекне ныгытучы физкультура буенча практик күнекмәләр алачак. Башкортстан Республикасының грантлар фондына һәм «Чишмә» спорт-сәламәтләндерү комплексы җитәкчелегенә бирелгән мөмкинлек өчен рәхмәт белдерәм, – дип билгеләп үтте «Сәламәтлек клубы» проекты авторы һәм координаторы Надежда Идиатуллина.

Исегезгә төшерәбез, проект «Чишмә районының социаль үсешенә ярдәм» хәйрия фондының коммерцияле булмаган оешмасы тарафыннан Башкортстан Республикасы Башлыгы грантлары фонды бәйгесендә җиңү яулау нәтиҗәсендә тормышка ашырылды.

– Пенсионерларны онытмаганнары өчен хакимиятебезгә рәхмәт. Бассейнга дәресләргә йөрү минем өчен зур шатлык. Күптән түгел «Башкортстанда озын гомерлелек» программасы буенча «Торатау» геопаркына бардым. Спорт – ул тормыш һәм мин аның белән шөгыльләнергә бик яратам. Мәктәптә укыганда футбол түгәрәгенә йөрдем, чаңгы ярышларында катнаштым. 73 яшемдә булсам да, бүгенге көнгә кадәр көч-куәтем ташып тора, күңелем күтәренке, – ди «Сәламәтлек клубы» проектында катнашучы Закир Атнагулов.