Сортларны алыштырыр вакыт

Көзнең икенче аенда бакча эшләре тәмамланды диярлек, шулай булса да, киләчәк уңыш турында онытырга ярамый.

Җимеш агачларының ботакларын кисәсе, кайберләрен күчереп утыртасы, һәм, иң мөһиме – яңа агачлар утыртасы бар.

Бу эшләрне ничек дөрес итеп башкарып чыгарга? Әлеге сорау белән «Чишмә җиләк-җимеш питомнигы»ның баш агрономы Илшат Карачуринга мөрәҗәгать иттек.

– Беренче чиратта, бакчаны коелган яфраклардан, чүп үләннәреннән тазартырга кирәк. Җирне сөргәнче сидерат (яшел ашлама) чәчәргә мөмкин. Бу туфракны яхшырту, азот белән баету һәм чүп үләннәреннән котылу максатында үстерелгән үсемлекләр, – дип сүз башлады Илшат Айдар улы. – Киләсе эш – җиләк культураларын күчереп утырту. Бакча җиләге август ахырында-сентябрь башында күчереп утыртыла, шул урынга алдан күп итеп су сибелә.

Көз көне бакчада җимеш агачлары утырту – төп эшләрнең берсе. Белгеч сүзләренә караганда, культураларның районлаштырылганын, ягъни нәкъ безнең климатта үсә һәм җимеш бирә алганнарын сайларга кирәк. Болар – алмагачның «антоновка», «уральский наливной», «башкирский красавец», «конфетное», «куйбышевское», «жигулевское», грушаның «розовый бочонок», «северянка», «красуля», карагатның «диковинка», «черный жемчуг», «багира», «лентяй», крыжовникның «грушенька» һәм «изумрудный» сортлары. Гадәттә, 2-3 еллык яшь агачлар утыртыла. Үсентеләрне прививка ясалган урынын карап утыртырга кирәк, ул җир өстеннән 2-3 сантиметр чыгып калырга тиеш. Кышкылыкка агачларны тамырлары туңмасын өчен пычкы чүбе белән каплыйбыз. Җимеш агачларын нинди аралыкта утыртуга игътибар бирү мөһим. Мәсәлән, биек булып үсә торган алмагачларны һәм грушаларны бер-берсеннән 5-6 метр, чия, слива, кәрлә грушалар һәм алмагачларны 3-4 метр, колонна сыман җимеш агачларын ике метр чамасы ара калдырып утыртсаң әйбәтрәк. Агачлар кечкенә чакта рәт араларына җимеш куаклары яки бакча культуралары утыртырга мөмкин.