Тырышкан табар, ташка кадак кагар

Кәбестәне балалары һәм туганнары белән бергәләп утырталар. Ни генә дисәң дә, биш мең төпне ялгызың гына утыртып булмый, ә менә күмәкләшеп эшләгәндә җиңелрәк. Бердәм булгач, эш җайлы бара дип юкка гына әйтмиләр бит.

– Кәбестә йомшак җир ярата, шуңа күрә бакчаны трактор белән эшкәрттек. Мотоблок белән генә йөреп чыксаң, өске катлам йомшак була, ә кәбестә өчен туфракны тирәнрәк сөрергә кирәк. Бу яшелчәне ачык җирдә үстергәндә су сибүгә аерым игътибар бирү мөһим, чөнки ул дым яратучы үсемлек. Тормыш иптәшем су сибү өчен җайланма эшләде, – диде Дилбәр Айрат кызы велосипед тәгәрмәчләре, бөтерчек һәм шланглардан эшләнгән кызыклы конструкциягә күрсәтеп. – Химик ашлама кулланмыйбыз, әмма ел саен җиргә органик ашлама кертәбез.

Елкыбаевлар сыер маллары да, кош-корт та асрыйлар. Үзләренең инкубаторы бар. Җир участоклары зур, кояшлы урында, кәбестә үстергәндә бу да зур әһәмияткә ия.

Елкыбаевларның бакчасында җиләк-җимеш культуралары да, барлык төр яшелчәләр һәм чәчәкләр дә үсә – аларга килеп бакчачылык буенча экскурсия оештырырга да була. Биредә алма, слива, төрле сортлы чия һәм башка бик күп җиләк-җимеш агачлары һәм куаклары бар.

– Егермеләп төп карлыган куагы үстерәбез, тормыш иптәшем аларны ботактан үзе үрчетә, – дип горурланып сөйләде Дилбәр.

Әйткәндәй, Айрат Чишмә май экстракцияләү заводында, ә Дилбәр үзе Дурас мәктәбендә башкорт теле укытучысы һәм директорның укыту эше буенча урынбасары булып эшли.