Бәлагә бер адым

Бәләкәчләр балалар мәйданчыкларында уйнаса да, зуррак үсмерләр бергәләшеп якындагы агачлыкларга һәм паркларга баралар. Анда исә, бернинди хәвефсезлек чарасыннан башка учак ягалар, агачларны бозалар.

Шушы көннәрдә Чишмә поселогының Революция урамындагы 31нче йорт янындагы бакчада сигез кешедән торган балалар төркемен күрдем. Бер каенның каерысын куптарып алганнар да ут кабызырга маташалар. Аларга ун-унбиш ел буена үскән агачны һәлак итүләре турында аңлаттым – чөнки каерыдан башка ул корыячак. Тирә-юньдә ут кабып китәрдәй коры яфраклар, агач ботаклары булуын, якындагы яшь каен һәм нарат үсентеләрен күрсәттем. Киттеләр. Аңлаганнардыр дип өметләнәсе килә.

Чишмә поселогында балалар күп. Һәр скверда һәм паркта дежур торып булмый. Әмма янгыннарны кисәтү буенча нинди дә булса чара күрү кирәк. Бер дә булмаса «Учак яндыру тыела» дигән язулы табличкалар куярга, янгын күзәтчелеге, полиция хезмәткәрләре, җәмәгатьчелек көче белән патрульдә тору оештырырга мөмкин…

Р. S. Шушы көннәрдә Чишмәдә ут белән уйнау сәбәпле, Чернышевский урамында берничә сарай янды.

Фото: https://tamlife.ru/uploads/2018/07/0_7cc82_8261bd92_xl.jpg