Корыч холыклы егет

Икенче раундта ул Казахстан спортчысы Шахид Смагулны нокаутка озатты. Ләкин, бу җиңү өчен күпме еллар тырышлык салынуын күпләр белми.

Дуслары һәм җанатарлары аны үз итеп «Береза» дип йөртә. Георгий ун ел элек, 13 яшендә гаиләсе белән Шөнгәккүлдән Чишмәгә күчеп килгәч, спорт белән шөгыльләнә башлаган. Мәктәпкә килгән яңа укучыны поселок малайлары сагаеп каршы ала һәм үзләренчә сынап карарга уйлый. Георгий  алар белән бәхәсләшмәскә, киресенчә, спорт аша коллективка керергә: яшьтәшләре белән уртак тел табарга тырыша, волейбол һәм баскетбол түгәрәкләренә языла. Ләкин мөнәсәбәтләр җайланмый, бер сыйныфташы белән тыныша алмыйлар. «Grizzly» сугышчылар клубында шөгыльләнүче ул малай юашлардан булмый. Якалашырга бер адым калгач, сыйныфташы аңа «Бүген спортзалга кил, шунда хәл итәрбез» дип чакыру ташлый. Георгий бара. Ләкин сугышу өчен түгел, ә курыкмавын исбат итү өчен...

«Grizzly» клубында ул мавыгып китеп шөгыльләнә башлый. Георгий Уфада тай боксы буенча беренче җитди турнирны яхшы хәтерли. Турнир барышында ул җиңелә килә, бернинди өмет юк кебек тоела. Әмма финалда, көчләр бетеп барганда, ул бөтен ихтыярын бер йодрыкка җыя һәм көндәшен сугып аудара.

– Нәкъ менә шул вакытта мин җиңүнең чагыштыргысыз тәмен тойдым, чын азарт уянды, – ди спортчы.

Ә бүген инде Георгий уңышка әлләни ышанып бармаучы һөнәри спортчы.

– Без беркайчан да уңышка өметләнмибез. Бары тик хәзерлек кирәк. Минем график – атнага алты, көненә ике тапкыр күнегүләр, – ди Березкин ныклы тавыш белән.

Аның әзерлеге – өч этаптан торган төгәл алгоритм: физик база, кондицияләр җыелмасы һәм рингта көрәш. Әмма физик көч – уңышның яртысы гына.

Георгийның уңышлары артында аның таянычы булган кешеләр – тренерлары Равил Галләмов һәм Тимур Туктаров тора. Алар «Grizzly» клубына нигез салып, Чишмәдә көрәшчеләр мәктәбе булдыручылар.

– Без һәрвакыт рингта көндәшләрне хөрмәт итәргә өйрәтәбез. Спортчыны тәртип һәм рухи ныклык аша җиңүгә әзерлибез, – ди Равил.

Георгий өчен остазлары әти кебек. Көрәш алдыннан күңел төшкәндә яки өметсезлеккә бирелгәндә, нәкъ менә тренерларының аталарча акыллы киңәш бирүе сафка кире кайтара. Йодрык белән сугыш кебек кырыс спортта психологик тотрыклылык бик мөһим.

Шаһид Смагулга каршы көрәшкә Георгий иң яхшы формада килгән. Казахстан спортчысы дүрт тапкыр нокдаунда булган, тәҗрибәле һәм куркыныч көрәшче.

Икенче раундта хөкемдар көрәшне туктата, чөнки «Береза» көчле һөҗүм: техник нокаут ясый (көндәше аңында кала, ләкин көрәшне дәвам итә алмый).

Халыкара мәйданда бу җиңү Георгий өчен генә түгел, бөтен Чишмә районы өчен дә зур уңыш. Кайчандыр яңа мәктәптә үз урынын табарга тырышкан гади малайдан дөньякүләм дәрәҗәдә Башкортстан данын яклаучы ир-егет үсеп җиткән.

Бүген Георгий Березкин – «Grizzly» спорт клубына яңа килгән егетләр өчен үрнәк. Аның мисалы шуңа өйрәтә: яңа урында сине ничек каршы алулары түгел, ә тырышлыгың, үз максатыңа тугры калуың һәм корыч холкың нәтиҗәсендә кем булуың мөһим.

Чемпионыбызны һәм «Grizzly» клубын әлеге җиңү уңаеннан котлыйбыз. Чишмә сезнең белән горурлана!