Фитнес-клуб ачылды

Шушы көннәрдә поселокның «АРТ» сәүдә үзәгендә шул ук исемдәге фитнес-клуб эшли башлады. Зур һәм матур залга заманча тренажерлар, төрле җиһазлар куелган, биредә эшләү өчен тәҗрибәле тренерлар сайланган. Район хакимияте башлыгы Ришат Мансуров, Башкортстан Республикасы Дәүләт җыелышы – Корылтай депутаты Раил Әсәдуллин Чишмә поселогында халыкны савыктыру максатында спорт үзәге ачу идеясен уңай бәяләделәр.

Үз хәбәрчебез «АРТ» фитнес-клубы хуҗабикәсе Раилә Акбердина белән әңгәмә корды.

– Спорт залын ачу идеясе кайдан килде? Чөнки биредә сәүдә ноктасы яки чыгымы азрак булган тагын берәр урын ачарга мөмкин иде бит.

– Бу карар безгә җиңел бирелмәде. Ел ярым нинди бизнес белән шөгыльләнергә, дип уйладык, фикер алыштык, исәп-хисап ясадык... Һәм агымдагы елның мартында гына «АРТ» сәүдә комплексының өченче катында фитнес-клуб ачу идеясе туды.

– Бирегә куелган җиһазларга, фитнес-зал интерьерына караганда, ул шактый кыйммәткә төшкәндер.

– Владивостокта заказ биреп эшләткән махсус идәннәр һәм Мәскәүдән кайтарылган спорт җиһазлары аеруча кыйммәткә төште. Бездә 30 тренажер, ә барлыгы 50гә якын спорт җиһазы, залдан тыш, массаж кабинеты, душ һәм тренер бүлмәләре бар... Планнарда – фитнес-бар ачу, спорт белән шөгыльләнүчеләр өчен махсус туклану оештыру.

– Раилә Тимергали кызы, биредә шөгыльләнү өчен нинди юнәлешләр бар?

– Фитнес-клубта төрле юнәлешләр буенча программалар каралган. Болар – тоталбоди, боди памп, степ аэробика, стрейчинг, йога, йога-терапия, зумба, көч юнәлешләре һәм башкалар. Әйтергә  кирәк, дәресләрне дүрт-биш ел эш стажы булган һөнәри инструкторлар алып бара, алар аерым программалар буенча эшли һәм шәхси тренировкалар үткәрә.

Фитнес-клуб ачу идеясен тормышка ашыру, халыкны сәламәт яшәү рәвешенә өндәү, яшь кызлар квалификацияле тренерлар булып эшләгән,  яхшы  итеп җиһазландырылган залны ачу тантанасы бирегә килүчеләрнең – җитәкчеләрнең дә, гади чишмәлеләрнең дә күңеленә хуш килде.

Безнең белешмә

Фитнес-клуб урнашкан заманча «АРТ» сәүдә комплексын 90нчы елларда район үзәгендә «ХТН» директоры Тимергали Гайфулла улы Нигъмәтуллин төзеткән.

Ул вакытта анда мунча һәм халыкка көндәлек ихтыяҗдагы товарлар сатылучы сәүдә комплексы булган.