Хәрәкәт, витаминнар, бассейн...

– Мин бокс, самбо, йөзү белән шөгыльләнәм, – дип уртаклаша Станислав Рыжов. – Лагерьга рәхәтләнеп йөрим. Киләсе елда да спорт күнекмәләрен дәвам итәчәкмен.

Ә Рафаил Вәлиәхмәтов өйдә күңелсез, ди. Ә биредә аның дуслары бар.

– Киләсе елда футболга языласым килә, – ди яшь спортчы.

Әскәр Фәизов лагерьга абыйсы Аслан белән килә.

– Безнең лагерь программасы балаларның буш вакытларын файдалы итеп физик активлыкта үткәрүгә исәпләнгән, – диде Балалар-үсмерләр спорт мәктәбе директоры Кирилл Трифонов. – Алар үзешчән сәнгать белән шөгыльләнәләр – җырлыйлар, бииләр, экскурсияләргә йөриләр, уйныйлар, әмма төп юнәлеш, әлбәттә, спорт һәм физкультура. Һәр көн йөзүгә йөрү – мотлак шарт. Безнең лагерьда яхшы ашаталар, туклану дөрес, балансланган, төрле. Укучылар спорт төрен сайлап, икенче елда үзләренә ошаган теге яисә бу секциягә йөри алсыннар өчен һәр көн нинди дә булса бер төргә – хоккейга, футболга, волейболга һәм башка башкаларга багышлана.

Футболга баргач, алар белән футбол буенча тренер шөгыльләнә, бассейнда йөзгәндә, су коенып кына калмыйлар – йөзү буенча тренер күнекмәләр үткәрә, башка спорт төрләре буенча да шул ук хәл.

– Әмма төркемнәр төрле, лагерьда спорт-савыктыру комплексына йөргән спортчылар да, безгә беренче тапкыр килгән укучылар да бар. Ахыр чиктә, төп максат: укучыларны сәламәт яшәү рәвешенә, спорт белән шөгыльләнүгә җәлеп итү. Ә моның өчен «Мәгариф» гомумдәүләт проектында күрсәтелгәнчә, барлык балаларның да сыйфатлы өстәмә белем алуга мөмкинлекләре булырга тиеш, – дип нәтиҗә ясады Кирилл Александрович.

Спорт лагереның савыктыру-күңел ачу планы балаларның яшь һәм физик үзенчәлекләрен исәпкә алып эшләнгән.

4 июньдә спорт лагерен тантаналы ачу булды. Чарага ата-аналар да чакырылды. Дүрт көн эчендә балалар тәрбиячеләре белән танышып, үзләрен уңайлы шартларда тойдылар һәм нәрсәгә дә булса өйрәнергә өлгерделәр. Лагерьда 125 бала алты отрядта шөгыльләнә. Укучыларның спорт кәефе отрядларының шаян атамаларында да чагыла – «Спортмир», «Легион», «Барселона», «Кипиш», «Чикләр юк» һәм «Югары лига».

Мавыктыргыч һәм кызыклы программа аларның көч-куәтен, сәламәтлеген, дуслык, активлык белән тулыландырыр һәм спортка карата кызыксыну уятыр, дип ышанабыз!