Истә калырлык булды!

Күптән түгел Башкорт агросәнәгать колледжының Чишмә филиалында Рәсәй студентлары көнен билгеләп үттеләр.

Чара колледж бинасы каршында саф һавада узды.

– Ә нәрсә булачак? Уеннар буламы? – дип кызыксынды ике студент кыз.

Озак та үтми чараны алып баручының «Егетләр-кызлар, хәзер уенны башлыйбыз, командаларга бүленегез», – дигән көр тавышы ишетелде. Һәр курстан алтышар студент сайланды.

Беренче ярыш капчык киеп йөгерү булды.

«Безнең студентларыбыз дәрескә ашыга-ашыга килергә ярата. Хәзер алар безгә ничек итеп ашыгуларын күрсәтәчәкләр», – дип шаяртты алып баручы.

Бу ярышта беренче курс студентлары иң җитезләре булып чыктылар, ә алардан соң финишка икенче курслар килде.

– Өченче курслар әле яңа гына уянды, ахры, – дип төртмә телләнде җанатарларның берсе.

Арытаба студентларны чаналарда һәм тюбингларда шуу, парлашып кыршау киеп узышу көтте. Ә ярышларның финал этабында командалар аркан тартыштылар.

Иң соңыннан студентлар һәм укытучылар командалары ярышты. «Хәзер без аларны ә дигәнче җиңәчәкбез», – дип җиңүгә ышаныч белдерде студентлар төркеменнән берсе. Тик җиңү яулау бик җиңел булмады, педагогик состав командасы арканны бердәм көч белән, җайлы итеп кенә үз ягына тартып чыгарды.

– Менә, без дә нәрсә дә булса эшли алабыз бит! – дип елмайды чараны алып баручы.

Уен нәтиҗәләре буенча беренче урын 1нче курс студентлары командасына бирелде, икенче һәм өченче урыннарны икенче һәм өченче курслар студентлары алды.