+17 °С
Облачно
Җәмгыять
11 Января 2021, 10:22
Сәләтле балаларга – Яңа ел бүләкләре
Балалар 25 декабрьдә – сәләтле укучыларга бүләкләр тапшыру көнендә Башкортстан Республикасы Башлыгы Радий Хәбиров исеменнән Яңа ел бүләкләре алдылар.
Зөлфия Нугаева
Чишмә районы хакимияте башлыгы Ришат Мансуров район музее каршындагы мәйданда төрле мәктәпләрдән килгән сигез баланы шул уңайдан тәбрикләде.
– Киләчәк, һичшиксез, актив, акыллы һәм максатчан яшьләр кулында, сез – безнең горурлыгыбыз, уңышлар телим! – дип балаларны сәламләде Ришат Әнис улы.
Бүләкләнүчеләр арасында уку алдынгылары, олимпиадаларда (шул исәптән патриотик характердагы), фәнни-гамәли конференцияләрдә, музыкаль бәйгеләрдә җиңүчеләр һәм призерлар бар иде. Беренче мәктәпнең 8А сыйныф укучысы Руслана Хәсәнова – экология, җәмгыять белеме, хокук буенча олимпиадаларда җиңүче. Ул әледән үк медицина университетына укырга керәчәген белә (югары уку йортына барып кайткан). Ә гимназиядә белем алучы сигез яшьлек Динар Байбурин тырышып укудан тыш, шахмат уйнарга да оста. Ул – шахмат буенча Бөтенрәсәй һәм республика ярышларында җиңү яулаган, яшүсмерләр җыелма командасы әгъзасы булып тора, шахмат буенча беренче разряды бар.
Бу көнне балалар өчен театр тамашасы да оештырылды. Яңа ел алдыннан бәйрәм чарасында катнашу балаларга киләсе елда да тырышып уку, спортта һәм иҗади бәйгеләрдә уңышларга ирешү өчен этәргеч булачак.
Район мәктәпләрендә дә алдынгы укучыларга һәм олимпиадаларда җиңүчеләргә, Бөтенрәсәй бәйгеләре лауреатларына, спорт ярышлары призерларына – барлыгы 204 укучыга муниципаль район башлыгы исеменнән бүләкләр тапшырылды. Бу көнне Ришат Мансуров үзе укыган мәктәптә дә булды, анда район Мәгариф идарәлеге начальнигы урынбасары Зилә Ямалетдинова белән сәләтле алты укучыга бүләкләр тапшырды.
Мәгариф идарәлеге начальнигы Сөләйман Ваһапов Алкин-2 мәктәбе укучыларын бүләкләү тантанасында катнашты. Поселок мәктәпләренә шулай ук идарәлек вәкилләре дә барды.