Сак булыгыз, талпан!

Чишмә районының үзәк дәваханәсе мәгълүматлары буенча, быел 30 марттан 6 майга кадәр талпан кадалып 24 кеше мөрәҗәгать иткән, шуларның унбере бала. Биш балага талпан энцефалитына каршы иммуноглобулин уколы ясалган.

Хәзерге вакытта район дәваханәсендә халыкка вакцинация үткәрелә. План буенча, талпан энцефалитына каршы 140 кеше вакцинация һәм 290 кеше ревакцинация ясатырга тиеш, ул өч ел саен ясала.

– Планны көздән үк төзибез, участок терапевтлары халыктан талпан энцефалитына каршы прививка ясатырга теләвен сораша. Шуның нәтиҗәләре буенча ел башында план төзедек, әлеге вакытта 16 кешегә прививка һәм тагын 58 кешегә ревакцинация ясалды. Ә хәвеф-хәтәр төркемендә булган урман хуҗалыгы хезмәткәрләре һәм урманнарга якын яшәүчеләр ел саен прививка ясата, – дип билгеләде Чишмә үзәк район дәваханәсенең табиб-эпидемиологы Наил Вәлиәхмәтов.

Талпан кадалса медицина учреждениесенә мөрәҗәгать итәргә кирәк. Талпанны ташларга яки тизрәк юк итәргә ашыкмагыз. Аны талпан энцефалиты вирусы булу-булмавын тикшерү өчен тапшырырга кирәк. Талпаннар Уфада «Башкортстан Республикасының гигиена һәм эпидемиология үзәге»ндә тикшерелә.

– Талпан кадалмасын өчен игътибарлы булырга, тәнне, кием-салымны карап чыгарга кирәк, – дип киңәш бирде Наил Мансур улы.

Фото: pixabay