Сөт алырга – даруханәгә

– Бөтен җирдә сөт кухнялары ачыла, безнең Чишмәдә кайчан булыр икән? – әлеге сорау район гәзитенең «ВКонтакте»дагы төркемендә һәм социаль челтәрләрдә дә күп тапкыр бирелде.

Ул көн җитте: Чишмә районында беренче чиратта яшь әниләрне сөендерәчәк үзгәрешләр булачак. 2020 елның 3 февралендә 27нче Үзәк район даруханәсендә, күп еллардан соң беренче тапкыр, сөт ризыклары бушлай биреләчәк.

– Даруханә бинасында сөт биру пункты оештырылачак, продукцияне безгә Октябрьский шәһәрендә урнашкан «Сөт кухнясы» бүлекчәсе китерәчәк. 2019 елның 30 декабрендәге карарга ярашлы, сөт ризыкларын халыкның өч категориясе: өч яшькә кадәрге балалар, йөкле хатын-кызлар һәм бала имезүче аналар алалачак, – дип хәбәр итте 27нче Үзәк район даруханәсе мөдире Алсу Ямгурова. – Продукция атнага ике тапкыр китереләчәк, китергән көнне үк тарату оештырылачак, соңга калганда икенче көнне иртән алырга мөмкин булачак.

Аның сүзләренә караганда, категорияләр узган елдагы кебек калган, тик элек коры катнашмалар һәм боткалар гына бирелгән. Октябрьский бүлекчәсе Чишмәдәге сөт пунктын ике зур суыткыч белән тәэмин иткән.

– Әниләр яки булачак әниләр документлар белән безгә килеп гариза язалар, ә без ул документларны Октябрьский шәһәренә тикшерү өчен җибәрәбез. Әлеге вакытта сөт продукциясе алуга 50 килешү төзелгән, – диде Алсу Мисбах кызы.

Республикада барлыгы 85 сөт бирү ноктасы бар. Болар – 21 фирма пункты, өчесе – партнер-эшкуарлар мәйданчыгы, икесе – балалар дәваханәләрендә һәм 58е – «Башфармация» предприятиесенең даруханәләр челтәрендә.

Балаларны табигый сөт ризыклары белән тәэмин итү буенча мондый күләмле программа Рәсәйнең, Башкортстаннан кала, бер генә төбәгендә дә юк.