Үпкә ялкынсынуы сәбәпле карантин

«Мәктәптә 12 ноябрьдән 2 декабрьгә кадәр дәваханәдән тыш үпкә ялкынсынуы буенча карантин игълан ителде.

Балаларны табиблар караячак. Барлык дәресләр бер сыйныф бүлмәсендә үтәчәк», – Уфада ата-аналар сыйныф җитәкчеләреннән шундый хәбәр алган.

Элегрәк Ura.ru басмасы Свердловск өлкәсендә Новоуральскида пневмониянең шул төре таралу турында хәбәр итте. Авыручылар санының 2019 елның җәеннән бирле артуы күзәтелә. Мәктәпләр карантинга ябыла, дәваханә палаталары тула, өстәмә урыннар әзерләнә.

«Башинформ» мәгълүмат агентлыгы дәваханәләрдә урын юклыгы турында октябрь урталарында ук хәбәр иткән иде.

«Үпкәсе ялкынсынган баланы дәваханәгә салдым. Поликлиникадан юллама алып, әзер рентген карточкасы белән госпитальгә ятканчы өч сәгать вакыт узды. Кабул итү бүлмәсе халык белән тулган. Дәваханәгә яту өчен 5–7 кеше чират көтә, өстәвенә «ашыгыч ярдәм» белән килүчеләр дә бар. Пневмония, бронхит, башка чирләр. Кызым коридордагы соңгы койкага ятты. Башка урын юк. Чирлеләр күп», – дип язган 14 яшьлек кызның әнисе Кристина Әфләтунова.

Дәваханәдән тыш пневмония – үпкәләр ялкынсынуы, ул стационарга ятканчы барлыкка килә яки дәваханәгә салганнан соң бер-ике тәүлектән ачыклана. Үпкә ялкынсынуының бу төре шулай ук өй яки амбулатория пневмониясе дип тә атала, дип хәбәр ителә Рәсәй кулланучылар күзәтчелеге сайтында.