«Торатау» геопаркы Байкал белән Алтайга көндәшлек тудырачак

Яшел зонага табигатьнең үзенчәлекле һәйкәлләре, Ишембай районы һәм күрше муниципалитетлар территориясендә урнашкан тарихи-мәдәни объектлар кергән. Алар исәбендә – Торатау һәм Юрактау шиханнары, Усолка геологик уемы, «Красноусольск» шифаханәсе, «Зилим» табигать паркы. Планда – «Макарово» мәгарә лабиринты, «Хазиново» археологик парк, Верхотор авылындагы сәнгать һәм кәсепчелек үзәге кебек, игътибарны җәлеп итүче үзәкләр булдыру.

Радий Хәбиров җитәкчелегендә үткән киңәшмәдә сүз проектны арытаба ничек үстерү турында барды. М. В. Ломоносов исемендәге Мәскәү дәүләт университетының икътисад факультетының мәдәният икътисады, шәһәр үсеше һәм креатив индустрияләрне тикшерү үзәге җитәкчесе Сергей Капков билгеләвенчә, геопаркта 47 табигать объекты бар, аларның 27се аеруча сакланыла торган табигать территориясе булып тора. Рәсәйдә башка бер җирдә дә мондый урыннар юк. Геопарк үсеше концепциясен булдыручылар сүзләренә караганда, туристлар агымы елына якынча 500 мең кеше тәшкил итәчәк.

– Барысы да Байкал, Камчатка, Сахалин, Алтай кебек брендлар турында белә. Әмма анда баручылар аз, чөнки бу бик ерак һәм кыйммәт. Ә «Торатау»

– ул Рәсәйнең зур шәһәрләренә якын урнашкан һәм яхшы транспорт юлы булган объект, – дип ассызыклады Сергей Капков.

Булачак геопаркның мәйданы 4,2 мең «квадрат» тәшкил итә, биредә җәяүлеләр, велосипедчылар юллары, елга буенча һәм ат белән бара торган маршрутлар, кемпинг мәйданчыклары булачак.

Туристик төбәк урамда яшәүчеләр өчен яңа эш урыннары булдырырга мөмкинлек бирәчәк. Сергей Капков сүзләренә караганда, проектның тәүге этабын 2021 ел азагына кадәр гамәлгә ашыру планлаштырыла. Төрле ярдәм программалары буенча, финанслауны җәлеп итү өлешендә федераль үзәк белән актив хезмәттәшлек алып барылачак. Проект сентябрь ахырында Севильеда (Испания) Европа геопаркларының 15нче конференциясендә тәкъдим ителәчәк.

– Сезнең искиткеч коллективка чиксез рәхмәт. Без бу эшне дәвам итәбез. Бу киңколачлы вакыйга. Проект буенча ныклап фикер алышу мөһим. Аңлашылуынча, әлегә анда инвестор бармаячак. Шуңа күрә беренче этапта безгә инфраструктура булдыру мөһим, «якорь ташлау» белән инвестицияләр дә барлыкка киләчәк, – дип нәтиҗә ясады Радий Хәбиров.

Исегезгә төшерәбез, «Торатау» геопаркын булдыру турындагы указга Радий Хәбиров 2018 елның 12 декабрендә кул куйды.

Фото: «Башинформ»