Йорт хайваннары турында

Гәзиттә бәйге дәвам итә. Хәзерге заманда күпләр өендә йорт хайваннары асрый. Һәркемдә диярлек эт, песи, ә кайчагында хайваннар дөньясының экзотик вәкилләре дә очрый. Хәтта ташбака, йомран, попугай асраучылар да бар. Аларга бәйле күпме мәзәк, дулкынландыргыч, ә кайчагында мистик хәлләр дә була. Кайвакыт хуҗалары мәчебез югалды дип чаң суга, ә ул ике-өч көннән соң берни дә булмаган кебек үзе кайтып керә. Этләр яки песиләр хәвефле хәлләрдә кешеләрне коткарган очраклар да ишетелә. Шулай ук дүрт аяклы дустың белән танышуга бәйле кызыклы вакыйгалар да бар. Хәтерегездә калган шундый кызыклы вакыйгалар булса, бу турыда безгә дә язып җибәрә аласыз.