Яраткан чәчәге – яран гөл

Венера Бәхти кызы, барыннан да бигрәк, яран гөлләрен ярата, аның бакчасында ак, ал һәм куе кызыл төстәге яраннар бик күп. Кышкылыкка ул аларны өйгә кертә, ә яз көне башта беседкага, аннары бакчага чыгарып утырта. Үсемлекләр дөньясы аңа укытучы буларак та таныш, чөнки ул Чишмә авылының 2нче мәктәбендә биология укыткан, анда коллектив һәм балалар белән бергә чәчәкләр дә, яшелчәләр дә үстергән. Биолог булырга аңа әтисе киңәш иткән, ул да бакча карарга яраткан, хәтта урманнан акчәчәкләр, сахра борычы алып кайтып утыртканы да булган.