Балачактан чәчәкләр яраттым

Чишмә поселогында яшәүче Резида Бадыгина кечкенәдән үк бакчада чәчәкләр белән мәш килергә яраткан.

«Элек гладиолус үстерүчеләр күп түгел иде, без аларны бала караган кебек тәрбияли, ә корыган очракта елый идек», – дип сөйләде ул. Хәзер аның бакчасында төрле-төрле: шәмәхә, ал, кызыл һәм ак төстәге гладиолуслар үсеп утыра. Резидә апаның бакчасы караулы, ялт иткән, хуҗабикәнең бакчачылык белән яратып шөгыльләнүе әллә кайдан күренеп тора. Биредә төрле төстәге лилияләр, флокслар үсә, арттарак зәңгәр дельфиниумнар, люпиннар, гортензияләр күренә, хәтта кыргый виноград та бар.

– Бервакыт күпме чәчәк үсүен санап карарга булдым, 30лап төр исәпләп чыгардым, һәм бу күпьеллыклары гына, ә берьеллыкларын санап та тормадым, – дип билгеләп үтте Резида апа.