Игезәкләр бер-берсен тулыландырып торалар

Биш яшьтән инглиз телен өйрәнәләр. Дүрт яшьтән «Grizzly» көрәшчеләр клубына тай боксына йөриләр, турнирларда катнашалар, төрле дәрәҗәдәге ярышларда призлы урыннар алалар.

Малайларның укытучысы Хәсәнә Мусина әйтүенчә, алар бер-берсенә бер тамчы су кебек охшасалар да, холыклары төрлечә. Берсе төгәл фәннәрдә көчле, санарга, исәпләргә һәм һәр җирдә тәртип булуын ярата, икенчесе гуманитар фәннәр белән кызыксына, китаплар укый һәм кроссвордлар чишә. Икесе дә кечкенәдән баянда уйнарга өйрәнгән.

– Алар картәтиләре Вил Байковның оста итеп баянда уйнавын сокланып күзәтеп торырга яраталар иде, – ди аларның әнисе Алиса Радик кызы.

Әсхәт белән Әскәрнең әти-әнисе улларының сәләтен кечкенәдән үк төрле яклап үстерергә тырышканнар.

– Алар әле сөйләшә дә белмәгән чакта, әкиятләр һәм хикәяләр укый идек, хәреф танырга өйрәнгәч, үзләре дә бик күп китаплар укып чыктылар. Хәзер инде аларның үзләре иҗат иткән шигырьләре дә бар, – дип сөйләде малайларның әнисе.

Балалар һәрьяклап актив. «Хәрби операциядә катнашучылар өчен өйдә киселгән токмач» акциясенә багышланган чарада катнашканнар, соңгы өч уку елында республика укучылары арасында үткән олимпиадаларда Ю. Гагарин исемендәге кубок призерлары, «Кит» халыкара конкурсының икенче дәрәҗә лауреатлары, «Язгы тамчы» хоры солистлары булганнар.

– Алар ике минут аерма белән тудылар һәм әле дә кайсысының зуррак булуы турында бәхәсләшәләр. Бер-берсеннән башка бер көн дә яши алмыйлар, еракта булсалар да бер-берсенең хәлен тоялар, берсенә кыен булса, икенчесе моны сизеп тора, туганы өчен борчыла, бер-берсенә һәрвакыт ярдәм итәргә тырышалар, – дип елмайды Алиса Байкова.