Чишмэ
+9 °С
Болытлы
Барлык яңалыклар

Яңа Мусада сабантуй үтте

Новотроицкий авыл Советы биләмәсенең Яңа Муса авылы халкы һәм кунакка кайтучылар чәчү эшләре тәмамлану хөрмәтенә үткәрелгән бәйрәмгә җыелдылар.

Яңа Мусада сабантуй үтте
Яңа Мусада сабантуй үтте

Новотроицкий авыл Советы биләмәсенең Яңа Муса авылы халкы һәм кунакка кайтучылар чәчү эшләре тәмамлану хөрмәтенә үткәрелгән бәйрәмгә җыелдылар.

Авыл янындагы акланда сәүдә итү, халык уеннары, ярышлар үткәрү өчен мәйданчыклар оештырылды, ә сәхнәдә үзешчән сәнгатьтә катнашучылар, Новотроицкий мәктәбе укучылары, мәктәпкәчә яшьтәге балалар һәм Уфаның «Нур» театры артистлары чыгыш ясады.

Күп гасырлар элек ата-бабаларыбыз да сабантуйлар үткәргәннәр. Алар безгә калдырган матур һәм күркәм йолаларны балаларыбызга һәм оныкларыбызга тапшырырга тиешбез. Сезгә бары тик яхшылыклар һәм тынычлык телим, – диде район хакимияте башлыгының беренче урынбасары Эрнес Кәримов.

Ул шулай ук басу хезмәтчәннәрен – механизаторлар Илдус Шәймөхәммәтов, Альберт Хәмитов һәм Мәҗит Хамматовны авыл хуҗалыгы идарәлегенең Мактау грамоталары белән бүләкләде.

Элегрәк сабан бәйрәме барлык авылларда да үтә иде. Анда басу алдынгыларын хөрмәтлиләр, төрле уеннар, бәйгеләр үткәрәләр иде. Бүгенге бәйрәм шул матур гореф-гадәтнең дәвамы булып тора. Үзем һәм барлык халык исеменнән бәйрәмне оештыручы авылдашыбыз Айдар Каюмовка рәхмәт белдерәсем килә. Аның картәтисе Гиндулла Газизуллин җаваплы вазифаларда эшләде, авылда хөрмәтле кеше булды, – диде эшкуар Фларит Гаймалетдинов.

Чараның иганәчесе авылдашлары алдында чыгыш ясап, әлеге матур бәйрәмне туганнары истәлегенә багышлавын әйтте.

Сабантуй күңелгә хуш килде. Милли көрәштә һәм башка күп кенә ярышларда катнаштык. Ә бер көн алдан авыл урамнары буйлап сабантуйга бүләкләр җыеп йөрдек, – дип тәэссоратлары белән уртаклаштылар яшь яңамусалылар Родион Нигъмәтҗанов, Динислам Исхаков һәм Эмиль Гыймранов.

Бәйрәм күңел күтәренкелеге, аралашу шатлыгы һәм авыл хуҗалыгы хезмәткәрләренә рәхмәт һәм хөрмәт хисе бүләк итте.

Яңа Мусада сабантуй үтте
Яңа Мусада сабантуй үтте
Автор:Гузяль Ибраева
Читайте нас: