Эрнест музыкада гына түгел, спортта да уңышка ирешкән

Чишмә музыка мәктәбенең «Йолдызчык» ансамбленә йөрүче Эрнест Кирәев берничә уен коралында уйный белә. Ул Чишмә егете, быел 7нче сыйныфны тәмамлаган.

– Кечкенәдән үк уен коралларында уйный башладым. Әнием, аккордеонда уйнаучы Рәсәй музыканты Петр Дранги чыгышларына карата кызыксынуымны сизгән. Аккордеон һәм балалайка көйләрен мөкиббән китеп тыңлый идем, шуңа күрә әни белән музыка мәктәбенә язылырга бардык. Картәтием дә баянда уйнаган, безнең гаиләдә барысы да көй-моңга гашыйк, – дип сөйләде Эрнест.

Ул төрле бәйгеләрдә җиңү яулаган, хәтта оркестр белән бергә музыкаль бәйгеләрдә катнашкан. Музыка мәктәбендә шөгыльләнә башлап ярты ел узгач «Яз күгәрчене» халыкара бәйгедә беренче дәрәҗә лауреат булган. Ул сольфеджио буенча бәйгеләрдә дә катнаша, анда призлы урыннар һәм дипломнар ала.

Эрнест музыкада гына түгел, спорт ярышларында да бүләкләр яулый.

– Спорт уеннарын яратам, лапта ярышларында катнашам. Хәтта спортның бу төрендә призлы урыннар да алдым, – диде ул.