Чишмэ
-11 °С
Болытлы
75 лет Победы
Барлык яңалыклар
Безнең тирә-як мохит
16 декабрь 2019, 11:30

Мансаф Карачурин: Безгә авария сөземтәләрен бетерергә туры килде

Чишмә Тарих-крайны өйрәнү музеенда «Чернобыль атом электр станциясендәге һәлакәтләрне бетерү: Чишмә районыннан анда катнашучылар» стенды һәм «Чернобыль – тарихыбызның кара фаҗигасе» дип аталган альбом-брошюра бар.

Стенд янында анда катнашучыларның берсе Мансаф Карачурин белән очраштык.
Ул алты якташы белән бергә 1 октябрьдә махсус җыенга чакырыла, аннан аларны Чернобыльгә җибәрәләр.
– Ул вакытта 1нче төзелеш-монтаж идарәлегендә эшли идем, 1986 елда Чернобыльгә җибәрделәр, 1 октябрьдән 4 ноябрьгә кадәр анда булдым, – дип сөйләде Мансаф. – Палаткаларда яшәдек, анда җылы, ә 9 ноябрьдә туган йортка әйләнеп кайтканда биредә кар яуган иде. Минем белән бергә чакырылган якташларымның берсе әлеге вакытта исән-сау.
Мансаф Карачурин сүзләренә караганда, аларны Куйбышев шәһәренә илтәләр, аннан алар поездда Киевка кадәр баралар. Зарарланган зонадан утыз чакрым ераклыкта яшиләр. Взводлар һәм роталар буенча билгеләгәннән соң алар сәнәгать зонасын, Припяти шәһәрен, Копачи поселогын йогышсызландыра башлый. Аларны көн саен лагерьдан шул зонага илтәләр һәм кире алып кайталар. Радиация күп булу аркасында көненә 15–20 минут кына эшләргә рөхсәт ителә. Әмма күпләрнең беренче көннән үк тамаклары, башлары авырта башлый.
– Туган ил чакыргач, димәк, шулай кирәк булган, куркыныч авариянең сөземтәләрен кемдер бетерергә тиеш иде бит, – диде Мансаф Мансур улы. – Әлеге вакытта улым һәм кызым, дүрт оныгым бар, өлкән оныгым Башкорт дәүләт университетының юридик факультетында укый, ә кечкенәсе бер яшь тә сигез айлык.
Мансаф Карачурин «Хөрмәт билгесе» ордены, «Чернобыль атом электр станциясендәге һәлакәтне бетерү турында истәлеккә» билгесе, шулай ук Батырлык ордены белән бүләкләнгән. Ул җәмәгать эше белән шөгыльләнә, унбиш ел инде «Чернобыль берлеге» район җәмәгать оешмасына җитәкчелек итә.
Гомумән алганда, авария нәтиҗәләрен бетерүдә Чишмә районыннан 37 кеше катнашкан.
Читайте нас в