Чишмэ
+26 °С
Болытлы
Барлык яңалыклар

Армиягә китәр вакыт җитте

Үткән атнаның якшәмбе иртәсендә Кораллы Көчләр сафларына язгы чакыру барышында Чишмә районыннан җиде егет тантаналы шартларда армиягә озатылды.

Исегезгә төшерәбез, республика нормалары буенча, быел апрель-июльдә районнан 92 кешене хәрби хезмәткә җибәрү планлаштырыла.

Бу көнне егетләрне озатып калу өчен әти-әниләре, дуслары һәм туганнары килде. Якында гына бер төркем яшьләр басып тора:

– Без дустыбыз Динәхмәт Нигъмәтуллинны армиягә озатырга килдек. Мин үзем хезмәт итеп кайттым, һәм дустыма да кайбер киңәшләр, үгет-нәсихәтләр бирдем. Аның исән-сау хезмәт итүен телим. Ә без аны сагынып көтеп торырбыз, – диде Баһрам Атаев.

Чишмә районы хәрби комиссариатының гражданнарны хәрби хезмәткә әзерләү бүлеге начальнигы Вәсим Мәхмүтов булачак солдатларга юлда үз-үзеңне тоту, исерткеч эчемлекләр куллану тыелу турында инструктаж үткәрде. Вәсим Сәгыйть улы шулай ук контракт буенча хезмәт турында сөйләде, сорауларга тулы җавап бирергә тырышты.

Егетләргә ташламалы тариф белән ике сим-карта бирелде: берсе солдат өчен, икенчесе – әти-әниләргә. Вәсим Сәгыйть улы армиядә Интернетка кереп булмый торган һәм камерасыз телефоннар гына рөхсәт ителүен ассызыклады.

Инструктаж үткәрелгәннән соң егетләрне табиб тикшерде.

– Бүген улым Александрны армиягә озатам. Хәрби хезмәткә үзе теләп китә. Барысы да яхшы булсын иде, дип борчылам. Армия – мәктәп яисә институт кебек, тормыш юлындагы бер баскыч, барырга кирәк, – диде Әмин авылыннан килгән Юлия Панарина.

Караякуп авылыннан Алмаз Әхмәтҗанов та һәр ир-егеткә армия мәктәбе үтү мөһим, дип исәпли.

– Туганнарны, якыннарны сагыначакмын, әлбәттә, әмма бер ел бик тиз үтеп китәр, дип уйлыйм. Ә хәрби билет киләчәктә эшкә урнашканда кирәк булачак, – диде ул.

Булачак Ватанны саклаучылар туганнары белән хушлашты, призыв пункты начальнигы хәерле юл теләгәннән соң егетләр утырган «Газель» юлга кузгалды.
Читайте нас: