Музейлар төнлә ишекләрен ача

Әлеге чарага республика тарихын саклаучылар да кушыла, кояш батканнан соң Уфада күргәзмәләр аеруча күп булачак. Агымдагы елда бу чара Рәсәйдә Театр елы барышында көнүзәк булган «Музей һәм театр»; республика оештырылуның йөз еллыгына «Башкортстан Республикасына 100 ел»; Башкортстанның халык шагыйре тууга йөз ел тулу уңаеннан «Мостай Кәримгә 100 ел» темаларына багышлана. Акциядә катнашучыларны чикләмәскә карар ителгән, яңа уй-фикерләр һәм идеяләр хуплана гына.

Акциядә Башкортстандагы йөздән артык музей һәм галерея катнашачак. Аңа дәүләт һәм муниципаль музейлар да кушыла. Кайбер корпоратив һәм шәхси музейларның катнашуы да көтелә. Башкортстанда «Музейлар төне» акциясе яңалыклары һәм вакыйгалары турындагы мәгълүмат республика музейларының социаль челтәрләрдәге сайтларында һәм сәхифәләрендә, шулай ук «Музейлар төне-2019» бөтенрәсәй акциясе сәхифәсендә тәкъдим ителәчәк (https://museumnight.culture.ru/).

Кайбер катнашучылар музейга килүчеләрне гаҗәпләндерергә теләп, оештырылачак программа турында хәбәр итә. Мәсәлән, Мәҗит Гафуриның мемориаль йорт-музеенда Башкортстан Республикасы оештырылуның 100 еллыгы уңаеннан Мәскәүдә «Балалар әдәбияты» нәшриятында бастырылган «Башкорт халык әкиятләре» китабының исем туе булачак. Ул тагын да эчтәлеклерәк һәм истә калырлык булсын өчен җыелучылар алдында музейның курчак театры чыгыш ясаячак (әйткәндәй, ул Мәҗит Гафуриның мемориаль йорт-музеенда күптән түгел барлыкка килде).

Күргәзмәләр залында Башкортстан Республикасы оештырылуның 100 еллыгы һәм Башкортстанның халык шагыйре Мостай Кәрим тууга 100 ел тулу уңаеннан музейга төнлә килүчеләр игътибарына «Гасыр параллельләре» күргәзмәсе тәкъдим ителәчәк. Бәйрәмгә килгән кунакларны шулай ук халыкның кул эшләре күргәзмәсе, аквагрим, буккроссинг зонасы, шахмат һәм шашка уеннары, «Ирекле микрофон» көтә. Музей хезмәткәрләре кечкенәләр өчен дә: «Минем республикам» темасына асфальтка төрле төстәге акбурлар белән рәсем төшерү бәйгесе, «Башкортларның көнкүреше», «Зур ясалма чәчәкләр» фотозоналары әзерләгән. Кичә «Бабич» фильмын карау белән тәмамланачак.

«Х-МАХ» Уфа галереясында килүчеләрне төн уртасына кадәр көтәчәкләр. Биредә рәссам Александра Железнованың «Иң караңгы сәгать» дигән атамадагы автобиографик китабының шул исемдәге проекты һәм аңа иллюстрацияләр тәкъдим ителә. Әлеге вакытта бу китап языла, ул якынча 2022 елда нәшер ителәчәк. Ул авторга, аның тормышына һәм түрә вазифасындагы эшенә багышлана.

Узган елда «Музейлар төне» акциясендә республиканың 70 меңнән артык халкы катнашты. Тәүге тапкыр ул 1997 елда Берлинда үтте. Рәсәйдә акция тарихы 2002 елдан башлана, нәкъ шул елда Красноярский шәһәрендәге музей тәүге тапкыр тәүлекнең караңгы вакытында килүчеләр өчен үз ишекләрен ачты.