Янгында кешеләр гомере өзелде

Күптән түгел Заводяновка авылында янгын булды. Янгын сүндерү хезмәтенә төнлә 2.55 сәгатьтә шул авылның бер урамында йорт януы турында хәбәр килә, янгын сәгать 3.18дә сүндерелә. Чишмә районының 95нче янгын сүндерү часте подразделениесе килеп җитүгә торак өчен яраклаштырылган мунча яна. Янгынны сүндергәннән соң анда 61 яшьлек ирнең һәм аның 36 яшьлек күршесенең гәүдәләре табыла. Алар бу кичтә бергәләп эчеп утырганнар, янгынның сәбәбе – ут белән саксыз мөгамәлә итү.

* * *

Шөнгәккүл авылында кошчылык фабрикасы бинасында эш көне ахырында янгын чыга.

20 квадрат метрлы корпус түбәсен ут ялмап ала.Республиканың Гадәттән тыш хәлләр министрлыгы хәбәр итүенчә, вакыйга урынына биш махсус автомашина, 11 коткаручы, ә соңрак ирекмәннәр килә. Янгын сүндерүчеләргә утны басу өчен бер сәгатьтән кимрәк вакыт кирәк була. Янгынның сәбәбе әлегә ачыкланмаган. Бәхеткә, зыян күрүчеләр юк.

Фото: Гадәттән тыш хәлләр министрлыгының БР буенча матбугат хезмәте