Эрик Сафин – кикбоксинг буенча Рәсәйнең спорт мастеры

Бүләкләү тантанасы августта Уфада узды. Спорт мастеры таныклыгын Эрикка Башкортстан Республикасының спорт министры Руслан Хәбибов тапшырды.

Бу – спортчы, аның гаиләсе, дуслары һәм остазлары өчен чын мәгънәсендә зур вакыйга. Чөнки мондый дәрәҗәгә ирешү – еллар буе дәвам иткән тырышлык, меңләгән күнегүләр һәм хәтта хәлеңнән килмәгән очракта да бирешмәү нәтиҗәсе.

Тренерлары Эрик белән хаклы рәвештә горурлана.

– Спорт мастеры исеме – спортзалда күп еллар шөгыльләнүче һәр спортчының хыялы. Хәзер Эрик алдында халыкара дәрәҗәдәге спорт мастеры исемен алу максаты тора, – ди аның остазы Равил Галләмов.

Кикбоксинг – бары тик физик көч һәм тизлек кенә түгел. Бу – тактик фикерләү, чыдамлык һәм көндәшеңә каршы тора белү сәләте дә. Эрик үзенең бу сыйфатларга ия булуын исбатлады. Аның уңышы – тренерлар,спарринг-партнерлар һәм якыннарының бердәм хезмәте нәтиҗәсе.

Эрик Сафин – Чишмә районының горурлыгы һәм яшь спортчылар өчен чын мәгънәсендә үрнәк. Аның мисалы яңа гына спорт юлына аяк баскан егетләрне илһамландыра, зур җиңүләр нәкъ менә беренче күнегүләрдән һәм «бирешмәү» дигән сүздән башлана.

Эрик Сафинны Рәсәйнең спорт мастеры исемен алуы белән котлыйбыз! Ирешелгәннәр белән генә чикләнмичә, яңа үрләр яулавын, алда әле бик күп лаеклы җиңүләр көтүен телибез. Киләчәктә дә лаеклы җиңүләр һәм үзебезнең егетләр өчен горурланырлык сәбәпләр булсын!