Ярты гасыр кулга-кул тотынып

– Бер-беребезне балачактан беләбез, шуңа күрә Рафаил өйләнешергә тәкъдим ясагач, озак уйлап тормадым, ризалык бирдем, – ди Халидә Мәсһәр кызы.

Алар 1976 елның 5 мартында өйләнешкәннәр. Тәүдә поселокта фатир алып яшәгәннәр, аннары Чишмә авылында зур йорт салып, шунда күченгәннәр.

Халидә Габидуллина лаеклы ялга чыкканчы шикәр заводында эшләгән, баштарак капчык цехында, аннары завод хезмәткәрләренә махсус киемнәр тегү бүлегендә хезмәт куйган.

Рафаил Сәхиулла улы һөнәренә тугры калып, гомер буе шофер булып эшләгән. Яшьрәк чагында берничә ел хладокомбинатта водитель булган, аннары Чишмә май экстракцияләү заводы автобусын йөрткән. Аның кебекләрне «Кулибин» диләр, ул бөтен төр техниканы сүтеп-җыярга һәм төзәтергә оста. Моннан тыш, ул барлык туганнарын һәм күршеләрен үзе уйлап тапкан һәр корган әйберләр белән гаҗәпкә калдыра.

Әлеге вакытта Габидуллиннар лаеклы ялда.

– Элегрәк атлар да, сыерлар да асрадык, хәзер тавыкларыбыз гына бар, бакча үстерәбез, – ди хуҗабикә.

Алар бер ул һәм бер кыз тәрбияләп үстергәннәр. Балалары да гаилә традицияләрен дәвам итеп, «Чишмә май экстракцияләү заводы» җәмгыятендә эшлиләр. Уллары әтисе эзеннән китеп шофер һөнәрен сайлаган. Бүгенге көндә юбилярларның өч оныклары һәм кечкенә оныкчыклары бар. Күптән түгел күңелле мәшәкатьләр булып узган – зур оныклары өйләнгән. Ә төпчек оныклары Азамат 9-нчы сыйныфта укып йөри, киләчәктә ул да тормышын техника белән бәйләргә тели.

Габидуллиннар пенсиядә булуларына карамастан, эшсез тормыйлар. Рафаил Сәхиулла улы гаражда мәш килә, тракторы белән йорт алдын көри, күршеләренә дә ярдәм итә. Халидә Мәсһәр кызы уңган хуҗабикә, төрледән-төрле камыр ашлары пешерә. Тормыш иптәше кулына гармунын алып, моңланып утырганда ул, кул эшләре белән шөгыльләнгән арада, аңа кушылып җырларга ярата.

Габидуллиннарның йорты күптән барлык якыннарын җәлеп итү үзәге булып тора. Кичләрен күршеләре кич утырырга керә, поселокта яшәүче туганнары килә – гомер буе шулай аралашып яшиләр.