Тату һәм хезмәт сөючән гаилә

Очрашу турында алдан сөйләшеп, аларга кунакка бардым. Иркен йортта безне җиденче сыйныф укучысы кызлары Алина белән бергә Хәмәтдиновлар каршы алды. Сүз уңаеннан, Алинаның «Беренчеләр хәрәкәте» активисты да булуын язып үтик.

Хәмәтдиновлар өч бала тәрбияләп үстергәннәр. Уллары Тимерхан Уфада пешекче-кондитер булып эшли. Зур кызлары Айгөл Түбән Хаҗәттә яши, хәзер инде ул үзе дә өч бала әнисе. Балалар үстерү, йорт һәм хуҗалык эшләре бе-лән мәшгуль. Башкорт дәүләт университетының журналистика факультетын тәмамлаган, заманында «Дим буйы» гәзитендә мәкаләләре дә басылып чыккан. Декрет ялында булганда читтән торып кондитерлыкка укыган, тәмле пироглар, төрле тәм-томнар пешерергә өйрәнгән.

Клара һәм Алик шикәр заводында эшлиләр. Берсе вакытлыча мизгелле эшкә чыкса, икенчесе исә даими нигездә эшли.

Хәмәтдиновлар производствода гына эшләп калмыйлар, ә йорт алды тутырып кош-корт, мал-туар һәм атлар асрыйлар.

– Апрельдә бройлер чебешләр сатып алган идек, хәзер инде авырлыклары 3-3,5 килограммга җитә, – ди Клара.

Өч теплицада кәбестә, борыч һәм помидор үсентеләре дә үстерәләр.

– Орлыкны үзем ясыйм, үсентеләрне сатам. Үзебезнең даими клиентларыбыз алдан сөйләшеп, өйгә килеп алалар. Быел помидорның тугыз сортын утырттым, – дип ассызыклады Клара Рәҗәп кызы.

Әйтергә кирәк, Клара ханым «Агинәйләр» башкорт хатын-кызлар оешмасының актив әгъзасы да булып тора.

– Сәламәт тормыш рәвешен пропагандалауга, башкорт халкының мәдәниятен һәм гореф-гадәтләрен саклауга багышланган төрле чаралар оештырабыз, – ди ул.

Күпләр хәзер авыл җирендә яшәве авыр, анда цивилизация юк, диләр. Хәмәтдиновлар мисалында алдыңа билгеле максатлар һәм бурычлар куеп, авылда да бик яхшы итеп яшәргә була, дип ышаныч белән әйтергә була.