Пешекчеләр таңнан уяна

Чишмә поселогының «Петушок» балалар бакчасындагы азык-төлек блогында берничә ел рәттән әниле-кызлы Фәнзилә Сабирова белән Динара Гаймалетдинова эшләгәннәр.

Аларның намуслы хезмәтен билгеләп үтәргә кирәк, әнисе кызын үз һөнәренең барлык нечкәлекләренә өйрәткән, ә ул, үз чиратында, үз өстенә күбрәк бурычлар алып, аңа ярдәм итәргә тырышкан. Динара Рәзит кызы бүгенге көндә дә, әнисе лаеклы ялга чыкканнан соң да шунда эшли.

Фәнзилә Галимҗан кызы балалар бакчасына кадәр Чишмәдә май заводындагы пекарняда эшләгән. Күпләр кайчандыр анда тәмле икмәк пешерүләрен әле булса хәтерли торгандыр. Аннары ул балалар бакчасына эшкә урнашкан һәм кызын да үзе янына чакырган. Динараның декрет ялы тәмамланып килгән, эшкә чыгар, кызын балалар бакчасына тапшырыр вакыт җиткән, һәм ул шатланып риза булган. Бер-берсенә ярдәмләшеп, бик тату эшләгәннәр. Динара әнисенә һәрвакыт булышырга тырышкан, эшкә теләп өйрәнгән. Ә хәзер ул үз белемнәрен хезмәттәшләренә һәм дусларына тапшыра. Динараның камыр ашлары бигрәк уңа, диләр алар.

– Мин иртән биштә эштә булыр өчен 3.30 сәгатьтә йокыдан торам. Бу инде гадәткә кергән, безнең гаиләдә озак йоклаучылар юк. Шуңа күрә миңа авыр түгел, киресенчә, күңелем тыныч. Эшне вакытында башкарам, өйдәге эшләргә дә вакытым һәм көчем җитәрлек, – ди Динара Рәзит кызы.

Ә Фәнзилә Галимҗан кызы бүгенге көнгә кадәр балалар бакчасындагы эшләр, сабыйларга нәрсә пешерүләре һәм ничә баланы ашатулары белән кызыксына. Ул үзе олы яшьтәге әнисен карый.