Салих авылыннан Расих Заһиров агачтан әйберләр ясау белән шөгыльләнә

Салих авылыннан Расих Заһиров лаеклы ялга чыккач агачтан әйберләр ясау белән шөгыльләнә башлаган.

Беренче һөнәре буенча ул – балта остасы-станокчы, әлеге белгечлек буенча хәтта бераз эшләргә дә өлгергән. Балачактан ук электроника белән шөгыльләнергә яраткан. Нәтиҗәдә, гомер буе электромонтер – 22 ел төньякта нефть промыселында, 20 ел Уфада дежур электрик вазифасында эшләгән. 2010 елда лаеклы ялга чыккан.

– Хәзер миңа 76 яшь, әмма үземне күпкә яшьрәк хис итәм, – дип елмая әңгәмәдәшебез. – Миңа актив иҗтимагый тормыш ошый. Эшсез утырырга яратмыйм. Пенсиягә чыгуга мине Салих авылы старостасы һәм зират караучы итеп билгеләделәр. Яраткан эшем белән шөгыльләнү өчен дә вакыт табам. Үземә остаханә ясадым, станоклар сатып алдым. Иң мөһиме, теләк булсын, – ди Расих Заһиров. – Мин шунда ук зур проектларга алынмадым. Буш вакытларымда агачтан табуреткалар, эскәмияләр, тәрәзә рамнары ясыйм…

Башта Расих Гобәйдулла улы кирәк-ярак материаллар сатып ала. Такталарны алты ай дәвамында киптерә. Кояш һәм җил дөрес кибү өчен яхшы шартлар тудыра, ди оста. Гади табуретка ясау өчен 2-3 көн китә, биш-алты станок кулланыла. Күпләр үз кулы белән нәрсә дә булса ясый белә, моның белән хәтта акча да эшли, дип фикер йөртә оста. Ә аның өчен агач эше – яраткан шөгыль, ә кайвакыт, сер түгел, өстәмә акча эшләү мөмкинлеге дә.

– Агач исен яратам. Мин зур булмаган, гади әйберләрдән башладым. Киләчәктә, бәлки, әкренләп катлаулырак эшкә алынырмын. Агач белән эшләүдән тәм табам, – ди ул.