Элекке укытучылар булмый

Аны авыл клубының сәнгать җитәкчесе, үз вакытында укытучы да, мәктәп директоры да булып эшләгән Лилия Гайнанова оештырды.

Түбән Тирмә авылының сигез еллык мәктәбе 1971 елда ачылган һәм 42 ел үткәч, 2013 елда ябылган.

Мәгариф учреждениесе ябылганнан соң тәүге рәсми чарага кайчандыр әлеге мәктәптә эшләгән, бар гомерен балалар укытуга багышлаган укытучылар һәм чыгарылыш укучылары чакырылды. Кунаклар республиканың төрле районнарыннан һәм шәһәрләреннән килделәр.

– Җитмешенче елларда Чишмә районында укучылар саны 20 меңгә җитте, ике меңгә якын укытучы бар иде. Данлы вакытларда кырыктан артык белем бирү учреждениесе төзелде. Ә Түбән Тирмә авылындагы мәктәп 1968 елда ачылды.

Түбәнтирмәлеләр күп фәннәр буенча беренчеләр рәтендә булдылар. Бу мәктәптә укытучылар да, укучылар да көчле иде, – дип горурланып хатирәләре белән уртаклашты 1971 елдан башлап 30 елга якын районның мәгариф бүлеге белән җитәкчелек иткән Фәнзил Габидуллин.

Әңгәмәгә чыгарылыш сыйныф укучысы Луиза Улимаева да кушылды.

– Без барлык укытучылардан да уңдык. Югары белемле педагог, физкультура укытучысы Рәмзил абый Гайнанов, мәсәлән, безнең белән олылар белән сөйләшкән кебек аралашты. Дәресләр бик кызыклы үтә иде. Аның безне ярышларга әзерләвен, интеллектуаль спорт төрләренә зур игътибар бирүен, шашка һәм шахмат буенча беренче урыннар гына алуыбызны хәтерлим. Көн саен иншалар һәм диктантлар яздырган рус теле һәм әдәбияты укытучысы Нурихан Гайнан улына рәхмәтлемен. Аттестат алганнан соң нинди генә һөнәр сайласак та, телне яхшы белү һәрчак ярдәм итте, – ди Луиза.

1993 елда әлеге мәктәпнең директоры итеп билгеләнгән Резеда Рөстәм кызы Мөхәммәтова очрашуга махсус Авыргазы районыннан килгән.

– Ул вакыттагы хыялым – мәктәпне матурлау иде, без моны булдыра алдык. Авыл халкы тырыш, укытучылар коллективы барлык башлангычларны хуплый иде, кыска гына вакыт эчендә Түбән Тирмәне яраттым. Хәзер дә, чакыру алгач, бик теләп килдем, күңелдә якты хатирәләр бик күп, – дип рәхмәт белдерде ул чараны оештыручыларга.

– Ә мин мәктәп директоры булып Талига Батталова эшләгән чорда укыдым. Аның тормыш иптәше Зәкиян Нургали улы физкультурадан укытты. Без спорт буенча һәрвакыт беренчеләр рәтендә идек. Менә ул чордагы грамоталар да сакланып калган икән, бүген аларны күрү күңелле. Укытучыларыбыз искиткеч иде. Алар безгә яхшы белем биреп кенә калмадылар, иң мөһиме – Туган илне, табигатьне, кешеләрне яратырга, аралаша белергә өйрәттеләр. Күп кенә чыгарылыш укучылары үз эшләренең һөнәриләре булып киттеләр, югары вазифаларда эшлиләр, – диде әлеге мәктәпне тәмамлаучы Венер Улимаев. 

Чакырылган кунаклар арасында 1971-1999 елларда мәктәптә эшләгән укытучылар Минҗиһан һәм Ахун Кавыевларның балалары да бар иде.

– Әти-әнигә карата җылы рәхмәт сүзләрен ишетү күңелгә рәхәт. Биш бала арасында без сеңлем Залидә белән династияне дәвам иттек, укытучы булдык, ә олы апабыз Лалә – тәрбияче. Мәктәп ябылганнан соң ун ел үтте инде, ләкин әлегә кадәр авыр. Ул вакытта, барысы да истәлек булып кына калачак, дип бик борчылган идек. Чөнки чыгарылыш сыйныф укучыларының очрашулары, электән килгән гадәт буенча, мәктәптә оештырыла иде. Клубтагы чара үтәсен белгәч, шатландык, – диде Лемма Ахун кызы бәхетле күз яшьләрен яшермичә.

Мәрьям Сатаева да укытучы.

– Әлеге мәктәпне тәмамлавыбыз белән горурланабыз. Үзем Уфада укытучы булып эшлим. Еш кайтып йөрим. Авыл клубы хәзер олыларны да, балаларны да җәлеп итүче бердәнбер мәдәни-мәгариф үзәк булып тора. Авылдан чыгып китүчеләр турында да онытмыйлар. Мин моңа бик шатмын һәм рәхмәтлемен. Клуб хезмәткәрләренең башлангычына һәрьяклап ярдәм итәчәкбез, – диде ул.

Бишбүләк районыннан килгән, 36 еллык педагогик стажы булган Гүзәл Каюмова да аңа теләктәшлек белдерә:

– Лилия Гайнанова белән Фәнүз Кирәев безне кайгысыз һәм күңелле мәктәп елларына алып кайткандай булдылар. Стеналарда элекке фотолар эленеп тора, безнең грамоталар һәм кубоклар белән күргәзмә ясалган. Без, Түбән Тирмәнең данлыклы мәктәбе укучылары, мондый җылы очрашулар күркәм гореф-гадәткә әверелсен өчен һәрчак ярдәм күрсәтергә әзербез.