Туган якка мәхәббәт белән...

Бу көнне авылдашлары һәм кунаклар аның картиналары аша Чишмә районының матур табигате һәм рәссамның туганнарының портретлары белән таныша алдылар. Аларның һәрберсендә Әнүз Аллаяр улының җан җылысы сакланган.

– Бүгенге көндә Нефтекама шәһәрендә яшәүче якташыбызның кунакка килүенә бик шатмын. Авыл халкының ата-бабаларны, тарихыбызны онытмавы сөендерә. Һәм мин моның рәсемнәрдә чагылуы белән чын күңелдән горурланам. Аларга карап, мин рәссамның истәлекләренә чумам, аның тормышын, хыялларын күз алдына китерәм. Картиналарына карап сокланам: аларда безнең төбәкнең гүзәл табигате су-рәтләнгән. Килүегез, безне сөендерүегез өчен рәхмәт, – дип чыгыш ясады чараны алып баручы Йомабикә Сафина.

Рәссамның картиналарында якты кояш нурлары төшкән һәм иртәнге чык бөртекләре ялтыраган урман акланнары, чиксез болыннарга җәелгән томан пәрдәсе, рәссамның күңеленә якын булган туган авылы тыкрыклары җанлана, аларга карап ул анда кабат әйләнеп кайткан кебек була.

– Күргәзмәгә куелган картиналарның берсендә мин үз йортымны һәм аның янәшәсендәге саегып барган буаны күрдем. Ә «Кышкы төн» пейзажы мине шулкадәр сокландырды, шуңа аны үземә сатып алырга булдым, – дип сөйләде Чишмә поселогыннан килгән Гүзәл Исламгулова.

Рәссам гади һәм лирик сюжетларга өстенлек биргән. Картиналарында туган якны ихлас сөю чагыла. Ул шулай ук иксез-чиксез киңлекләрнең матурлыгын һәм ата-бабаларыбыз туган җирнең кабатланмас табигатен оста итеп чагылдырган.

Күргәзмәдә аның 30дан артык эше тәкъдим ителде.

– Иҗади сәләтем сигезенче сыйныфта ук күренә башлады. Мәктәптә укыганда «Советская Башкирия» газетасыннан карап карикатуралар төшергән дәфтәрем әлегә кадәр саклана. 1968 елның кышында мине армиягә алдылар. Рәсем ясавымны белгәч, еш кына стена газеталары бизәргә, лозунглар язарга кушалар иде. Өйгә кайткач чын картина төшереп карарга булдым. Шунда мин гомеремне иҗатка багышларга теләвемне аңладым һәм үз эшләремне Уфа сәнгать училищесына күрсәтергә алып бардым. Укытучылар ошаттылар һәм мине укырга кабул иттеләр. Имтихан тапшырганда мин авыл пейзажын – йорт, агач янындагы иске эскәмия, сыерларын көтүгә куучы әбине сурәтләдем, – дип искә ала Әнүз Аллаяр улы.

Оста туган авылы һәм тирә-юньдәге табигать белән илһамлануы турында сөйли. Әнүз абый үзенең «Кымыз» дип аталган бер картинасын мәчеткә бүләк итәргә уйлый.

– Авылдашларга искиткеч күргәзмә оештырганнары өчен бик рәхмәтлемен. 28 июньдә Корбан бәйрәменә килгәндә тагын да күбрәк картиналарын алып килергә вәгъдә итте, – диде Урта Хаҗәт авылы клубы мөдире Рәлиф Сафин.

Дөнья ничек кенә үзгәрмәсен, гаилә, мәхәббәт, игелеклелек, туган якны сөю кебек кыйммәтләр элеккечә кала.