Һөнәр түгел, ә сәләт

Әмма төрле чараларны оештыру өчен зур тырышлык таләп ителә. Алар художество җитәкчесе генә түгел, завхоз, режиссер, сценарист, тавыш режиссеры, артист, чараны алып баручы, дизайнер һәм бизәүче дә...

Горный Мәдәният йортының сәнгать җитәкчесе Мәмдүдә Җиһангирова да 26 ел мәдәният өлкәсендә эшли.

– Күп еллар Гүзәл Хисамова белән эшләп пенсиягә киттем, әмма бер елдан соң йөрәк кушуы буенча кире эшкә чыктым. Хәзер мин яшь белгеч Анжела Бегишева белән мәдәният өчен җавап бирәм. Авылда эшләүнең үз нечкәлекләре бар. Монда талантың булу гына җитми, оештыру сәләте дә, идеяләрне тормышка ашыру теләге булу да мөһим, югыйсә нинди дә булса чара уздыру авырга төшә, – дип елмая Мәмдүдә Мәүлет кызы. 

Аның әйтүенчә, авылда бер бәйрәм дә Авыл активистлары – «Сударушка» ансамбле һәм «Землячки» төркеме әгъзалары – Гөлсирә Байбурина, Сәадәт Асәдова, Фидалия Хәбирова, Зөһрә Сабирова, Рәйлә Байбурина, Рәшидә Исабаева, Татьяна Шишкина, Татьяна Полякова, Зарина Гобәйдуллина, Эльвира Гайнанова, Алена Кандрашкина, Фәридә Солтанова һәм Эльвира Гайфуллинадан башка үтми. Халык фольклор ансамбле катнашлыгындагы барлык чаралар тәҗрибәле һәм сәләтле, күңеле мәңге яшь пенсионерлар Тамара Лебедева һәм Валентина Кандрашкина тырышлыгы белән оештырыла. Барлык концертларда һәм бәйрәмнәрдә матур костюмнар киеп чыгыш ясыйлар. Гүзәл Хисамова Горный мәдәният йорты директоры булып эшләгән елларда балаларга да, өлкәннәргә дә сәхнә киемнәре тегелгән, хәзер алар ихтыяҗ булган саен яңартыла.

– Концертлар белән чыгыш ясыйбыз, акча эшлибез, җитмәсә – үзебездән өстибез, тукымалар сатып алабыз, өйдән тегү машиналары алып килеп тегәбез. Миңа беркайчан да төшенкелеккә бирелмәгән, энергиясе ташып торган балалар белән эшләү ошый. Берничә дистә еллар элек сәхнәдә чыгыш ясаган кечкенә артистларның әле дә авыл тормышында актив катнашуы, хәзер инде үзләренең дә күп чараларны оештыруы күңелле хәл. Җитәкчелек тә ярдәм кулы сузарга тырыша. Авыл старостасы Роман Әсәдуллин белән бергә күп проектлар тормышка ашырыла. Караякуп авыл Советы биләмәсе башлыгы Рәфис Карагуловның да безнең проблемаларга битараф калганы юк: эш буенча килгәндә безнең белән дә сөйләшергә, сөйләшкән арада клуб болдырыннан кар көрәргә дә өлгерә. Чишмә районы хакимияте башлыгы Ришат Мансуров күп яңалыклар кертте – мәдәният хезмәткәре һөнәренең дәрәҗәсен күтәрде. «Лира» премиясе генә дә ни тора! Мондый мохиттә эшләве дә күңелле. Кызганыч, мин пенсиядә инде, хәзер иҗат итү өчен мөмкинлекләр шулкадәр күп. Эх, бераз яшьрәк булсам иде, – ди Мәмдүдә Җиһангирова.

Аңа карап ирексездән: «Яшьләрдә дә шулкадәр дәрт-дәрман юк әле ул!» дип уйлап куясың.