Хезмәт иясе турында берничә сүз

Хезмәт эшчәнлеген 1986 елның октябрендә, армиядән кайтканнан соң, башлаган. Әлеге вакытта ул әзер продукция складында эшли. Бригадир буларак, үз сменасында эш барышын оештыра, йөк төяүчеләрнең эшен дә контрольдә тота. Йөк төяүче эше – авыр физик хезмәт, өстәвенә капчыкларны геометрик төгәллек белән өя белү дә мөһим. Төягәндә һәм бушатканда, йөкләрне склад эчендә ташыганда хәвефсезлек техникасын үтәү турында да онытырга ярамый.

Сергей Кривольцевич бригадасы җитештерү мизгелендә капчыкларга тутыру цехыннан 40–50 тонна шикәр комы ташый. 2019 елда әзер продукция складына 80 004 тонна, ә 2020 елда – 80 949 тонна шикәр комы китерелгән.

Продукциянең өзлексез сатылуы турыдан-туры йөк төяүчеләрнең эшенә бәйле. Сергей Григорьевичның, тәҗрибәле бригадир буларак, эшләрне оештыра белүе ярдәмендә көндез булсынмы, төнләме, бер генә техника да заводтан буш китми.

Ул яшьләргә дә үз тәҗрибәсен өйрәтә, яңа эшкә килүчеләргә җайлашып китәргә ярдәм итә.  

Завод җитәкчелеге әзер продукция сакланган складта һәрвакыт чисталык һәм тәртип булуын таләп итә. Йөк төяүчеләр бригадасы шикәр комы әрәм булуга юл куймый – транспортерлардагы барлык капчыклар да өеп куеласы урынга кадәр түкми-чәчми илтеп җиткерелә.

Сергей Григорьевич – актив кеше, «Сабантуй» бәйрәмендә оештырылган спорт ярышларында да беренчеләрдән булып катнаша. 

Шунысы куанычлы, предприятие җитәкчелеге үз хезмәткәрләрен югары бәяли. Сергей Кривольцевич озак еллар намуслы хезмәте һәм эшкәртү производствосында ирешкән уңышлары өчен Башкортстан Республикасы Авыл хуҗалыгы министрлыгының Мактау грамотасы һәм Рәсәй Федерациясе Авыл хуҗалыгы министрлыгының Рәхмәт хаты белән бүләкләнгән. 2021 елда аңа «Башкортстан Республикасының атказанган азык-төлек индустриясе хезмәткәре» дигән мактаулы исем бирелгән. Җырда язылган «Дөньяда хезмәт иясеннән дә югарырак исем юк» дигән сүзләр белән килешми мөмкин түгел.