Урак чоры кызганнан-кыза

Басу-кырларда урак чоры кызган мәлдә студентларның ничек эшләве белән кызыксындык.

«БАИ»ның Чишмә бүлекчәсе управляющие Марс Фәйзуллин аларны мактап телгә алды.

– Егетләр булдыра. Эшлиләр, тырышалар. Күбесе шәһәрдә туып үсүгә карамастан, авыл хуҗалыгы машиналарыннан куркып тормыйлар, үзләре ремонтладылар, менә дигән итеп эшлиләр. Әле кырда арпа уралар, шунда күреп сөйләшә аласыз, – диде ул.

Басуга юл тоттык. Без барганда анда сигез комбайн эшли иде, икесендә –  студент-практикантлар.

– Яхшы эшлиләр, ватылганда үз куллары белән тиз арада төзәтергә тырышалар. Кырда даими рәвештә сервис хезмәте дежур тора. Хезмәт җитештерүчәнлеге дә начар түгел. Көн яктысында 5-6 бункер ашлык суктырып алалар. Бер бункер – җиде тоннадан артык. Әлбәттә, барысы да уңышка, башакларның егылмавына бәйле, – ди агроном Рәдиф Ибраһимов.

Гөрелдәп утыручы комбайн янында яшь кенә егет осталарча мәш килә, кулыннан эш килгәне әллә кайдан күренеп тора.

– Генераторны алыштырдым. Хәзер башак күтәргечләрне салдырам да эшне дәвам итәм. Комбайн көйле эшли. Уңайлы техника, тавышсыз, кондиционеры бар. Ватылуга килгәндә, булгалый инде. Вак-төякне үзебез төзәтәбез, җитди ремонт кирәк булса инженерлар ярдәм итә, – ди Эльдар Гыйбадуллин.

Калган өч студент башка участокларда эшли иде.

– Алар комбайнда түгел. Авыр техника, дип бераз шүрләделәр бугай. Зур тракторларда эшләүне өстенрәк күрәләр, – ди Марс Фәйзуллин.