Кышкылыкка печән, сенаж һәм силос

«Агро-Альянс» хуҗалыгында мал азыгын 11 июньдә, узган ел белән чагыштырганда, ун көнгә иртәрәк әзерли башлаганнар, ә бу атнада тәүге сенаж базын салуны тәмамларга планлаштыралар. Базга көн саен 250–300 тонна яшел үлән – люцерна салына. Мал азыгы әзерләүдә сигез кеше эшли, җиде агрегат – «Джон Дир» чапкычы, мал азыгы ургыч «Дон 680» комбайны, шулай ук ташып торуда тагын бер «Джон Дир», «КамАЗ» һәм ике «Т-150» тракторы катнаша. Үләнне чабу һәм ташу бер сменада, ә менә сенаж тыгызлау тәүлек әйләнәсенә дәвам итә. Механизаторларга көнгә ике тапкыр кайнар ризык ашату оештырылган.

Рәмзис Бикбулатов «Агро-Альянс»та 1992 елда эшли башлаган, төрле техникада эшләргә өлгергән, әлеге вакытта мал азыгы ургыч комбайнда хезмәт куя. Уҗымнар чәчәр вакыт җиткәч «Джон Дир»га күчеп утырачак. Аның алмашчысы – 21 яшьлек Динар Байковның механизатор булып эшләвенә ике ел булган, өлкән хезмәттәшләре аның белән тәҗрибә уртаклаша. Әйткәндәй, быел Динар районда үткән сабанчылар бәйгесендә өченче урын алды.

– Хуҗалыкта малларга 400 гектарда люцерна, 150 га кындырак һәм силоска салу өчен 130 гектарда кукуруз үстерелә. Көннәр салкын тору һәм явым-төшем җитмәү сәбәпле, люцерна куе үсмәде, шуңа күрә икенче чабымга өметләнергә кала, – диде хуҗалыкның баш агрономы Рамил Ибраһимов.

Рамил Солтангәрәй улы сүзләренә караганда, узган елда хуҗалыкта гомуми күләме 5 мең тонналы өч сенаж чокыры салынган. Быел да шул кадәр әзерләргә планлаштыралар. Ә узган елдан печән һәм салам калган.

«Агро-Альянс» хуҗалыгында мал азыгы әзерләү белән беррәттән пар җирләре эшкәртелә һәм чәчүлекләр карала, аерым алганда, уҗым һәм сабан культураларын авыруларга һәм корткычларга каршы эшкәртү башланган.