Башкорт теле буенча диктант

Башкортстанның Мәгарифне үстерү институтының Милли мәгариф буенча ресурс үзәге һәмреспубликаның күчемсез мәдәни мирас объектларын саклау һәм файдалану буенча фәнни-җитештерү үзәге халык-ара диктантны «Турахан» визит-үзәгендә үткәрергә тәкъдим итте.

Диктантны педагогика фәннәре кандидаты, БР Мәгарифне үстерү институтының Милли мәгариф буенча ресурс үзәге директоры урынбасары Мәрхәбә Дәүләтшина укыды.

«Диктантта катнашу – ул белемнәребезне тикшерү генә түгел, үзебезне зур һәм тату гаилә, мәдәниятебезне саклаучылар итеп тою мөмкинлеге дә», дип үз фикерен белдерде ул.

– Башкорт теле – безнең тиңдәшлекнең мөһим өлеше. Ел саен үтүче диктант мәдәни мирасыбызны сакларга булышлык итә. Бу гади чара гына түгел, ә безнең һәрберебезгә башкорт сөйләменең байлыгына һәм матурлыгына сокланырга мөмкинлек бирә торган чын мәдәни дулкын, – дип билгеләп үтте Мәрхәбә Сәяфәр кызы.

Үрге һәм Түбән Тирмә авылларыннан Гөлсинә Ибраева белән Лилия Гайнанова да башкорт теленнән диктант язып, үз белемнәрен тикшереп карадылар.

– Беләсезме нәрсә? Миңа бик ошады! Мәктәп елларына кире кайтып грамматика өйрәнгән һәм үз фикерләребезне башкорт телендә тасвирлап бирергә өйрәнгән кебек тоелды, – дип тәэссоратлары белән уртаклашты Г. Ибраева.

– Бу кадәр мавыктыргыч булыр дип уйламаган да идем! Мин үзем татар, әмма башкорт дусларым күп. Матур һәм моңлы башкорт теле күңелемә якын, – ди Лилия Гайнанова.

Оештыручылар диктант язарга килүчеләргә рәхмәт белдерделәр, чөнки мондый чараларда катнашу башкорт мәдәниятенең байлыгын ачарга, дөньяга карашны киңәйтергә һәм тел байлыгын ныгытырга ярдәм итә.

«Турахан» визит-үзәге администраторы Флорида Байкова киләсе елда бу мәйданчыкта Башкорт теленнән халыкара диктант язуда катнашучылар күбрәк булыр дип ышана.