Юлларда фаҗига булмасын өчен үсмерләрне руль артына утыртмагыз!

– Без халыкны читтә калмаска, бергәләп балаларыбызның һәм тирә-юньдәгеләрнең гамәлләренә игътибарлы булырга чакырабыз. Аларга юлда йөрү кагыйдәләрен үтәүнең мөһимлеген аңлатыгыз. Бу эшкә барлык өлкәннәр дә кушылса, бәла-казаларны булдырмау һәм балаларыбызның гомерен саклап калу мөмкинлеге булачак.
Әлфия Вәлиева аңлатып үтүенчә, Чишмә районында балигъ яшькә җитмәгәннәр арасында авто-мототранспортка рөхсәтсез идарә итүне кисәтү буенча актив эш дәвам итә. 2024 елда мопедлар, байклар һәм квадроциклларда йөргән утыздан артык бала туктатылган һәм профилактик исәпкә куелган, ә аларның әти-әниләренә 5 меңнән 15 мең сумга кадәр штраф салынган. Исегезгә төшерәбез, 16 яшьлек балалар да административ җаваплылыкка тарттырыла ала.

Тоткарланучыларның транспорт чаралары махсус тукталышка куелган. Әлеге фактлар буенча административ тикшерү эше башланган, бу юлда хәвефсезлек кагыйдәләрен төгәл үтәү кирәклеген ассызыклый. Гаеп машина йөртүче үсмерләрдә генә түгел, ә балаларына мопед яки квадроцикл йөртергә рөхсәт иткән ата-аналарда да.

Өлкәннәрнең балаларына транспорт йөртергә рөхсәт итүе өчен җавапка тартылуын билгеләп үтик, моның өчен штраф 30 мең сум тәшкил итә.
Әлфия Вәлиева билгеләп үтүенчә, ата-аналар сүзләренә караганда, аларның күбесе заманча транспорт бүләк итеп балаларын шатландыру өчен хәтта кредит ала. Әмма кайбер транспорт төренә идарә итү өчен махсус таныклыклар таләп ителүе һәм яшь буенча чикләүләр булуы турында да онытмаска кирәк.
– Балалар юлдагы хәвефне аңламыйча транспорт руле артына утыра. Аларга юл хәрәкәте кагыйдәләре һәм хәвефсезлек турында сөйләү, ни өчен каска кияргә һәм законнарны үтәү кирәклеген аңлатырга кирәк, югыйсә алар моны игътибарсыз калдырырга мөмкин, – ди Әлфия Вәлиева.
«М» һәм «А1» категорияле транспортка идарә итү хокукы – 16, ә «А» категориясенә 18 яшьтән бирелә. Шулай ук питбайкны да дәүләт юл хәрәкәте хәвефсезлеге инспекциясендә теркәргә кирәк. Машина йөртү таныклыгы булмаган очракта, питбайк белән кырыңда инструктор булганда һәм бары тик махсус җиһазландырылган мототрассаларда гына йөрергә ярый.