Майга купшы чәчәк түтәлләре булачак

– Быел без яңа юнәлеш буенча эшләргә – цинния үстерергә уйлыйбыз. Бу чәчәкләр безнең климат шартларында яхшы үссәләр, аларны бәрхет гөлләр урынына утыртачакбыз. Цинния чәчәкләре талымсыз булулары белән аерылып тора, алар эссегә, салкынга һәм кырауларга да чыдам, – диде Рәдиф Газзалов.

Сүз уңаеннан, поселоктагы клумбаларның ничек булачагы нәкъ аңа бәйле.

Петуния, цинерария, бегония һәм виоланың тәүге үсентеләрен сирәкләргә вакыт җиткән дә инде. Поселок урамнарына 9 Май бәйрәме алдыннан район халкын һәм кунакларын сөендереп аллы-гөлле чәчәкләр утыртылыр.

Рәдиф Газзалов сүзләренә караганда, Киров һәм Гыйззәтуллин урамнары чатында шулай ук Җиңү паркында быел яңа чәчәк түтәлләре барлыкка киләчәк.

Бөек Җиңүнең 80 еллыгына әзерлек уңаеннан поселок урамнарына чәчәкләр утырту һәм төзекләндерү буенча яңа идеяләрне тормышка ашыру планлаштырыла, әлегә болары сер булып кала.