Сугышчыларның якыннары белән очрашу

Һәлак булган хәрбиләрнең туганнарының сорауларына район хакимияте башлыгы Ришат Мансуров, хакимият башлыгының социаль мәсьәләләр һәм кадрлар буенча урынбасары, муниципалитетта махсус хәрби операция мәсьәләләре буенча координатор Илдар Әсәдуллин, Чишмә районы хәрби комиссары Илфир Сәлимгәрәев, «Ватанны саклаучылар» төбәк фондының Чишмә районындагы филиалы социаль координаторы Ксения Бортник һәм «Ватан гаиләләре» комитетының район бүлеге җитәкчесе Гүзәл Камалова җавап бирделәр.

Ришат Мансуров билгеләп үтүенчә, хәзерге вакытта республиканың төп бурычы — махсус хәрби операциядә катнашучыларга һәм аларның гаиләләренә һәрьяклап ярдәм күрсәтү, шулай ук һәлак булган хәрбиләрнең гаиләләре очрашкан проблемаларны хәл итү.

Ул шулай ук район кешеләренең, бөтен республикадагы кебек үк, бердәмлек һәм теләктәшлек күрсәтеп сугышчыларга һәм аларның якыннарына ярдәм күрсәтүен ассызыклап үтте.

Чишмә районында барлык сорауларны тикшерү буенча планлы эш алып барыла, җавапларны профильле хезмәтләр әзерли.

Югарыда санап үтелгән барлык белгечләр, шулай ук Шәйморатов исемендәге волонтерлык штабы көн саен махсус хәрби операциядә катнашучыларга бәйле мәсьәләләр белән шөгыльләнә һәм проблемаларны муниципаль этапта ук хәл итәргә ярдәм итә.

Әмма хакимиятнең барлык мөрәҗәгатьләрне мөстәкыйль карау вәкаләте юк. Мондый очракларда җаваплы бүлекчәләр сорауларны тиешле оешмаларга, шул исәптән Россия Федерациясе Оборона министрлыгы структураларына җибәрәләр һәм аларны тикшерү барышын күзәтәләр.

Шунысын да билгеләп үтәргә кирәк, махсус хәрби операциядә катнашучыларга ярдәм итү системасы яңа ихтыяҗлар нигезендә яхшырачак һәм үзгәрәчәк. Бу хакта 2024 елның 4 декабрендә «Туры элемтә» барышында Башкортстан Республикасы Башлыгы Радий Хәбиров та сөйләде. Радий Фәрит улы ассызыклавынча, кирәкле ярдәм чараларын билгеләү һәм аларны финанслауны һәм гамәлгә ашыруны тәэмин итү өчен «Ватанны саклаучылар» фондына мөрәҗәгать итәргә кирәк.

Исегезгә төшерәбез, Чишмә районында «Ватанны саклаучылар» фонды филиалының социаль координаторы булып Ксения Бортник тора. Аның сүзләренә караганда, Чишмә районында һәлак булган хәрбиләрнең 79 гаилә әгъзасы, хәрби хезмәттән азат ителгән унбер сугышчы һәм бер инвалид бар.

Очрашуда шулай ук хәрби операциядә катнашучы яки һәлак булган сугышчыларның хәбәрсез югалуына бәйле хәлләрдән үзләренә файда алырга тырышып шалтыратучы мошенникларның күбәеп китүе турында да сүз барды.

Чарага килүчеләрнең берсе үзенең шундый аферага эләгүе турында сөйләде. Якынын җирләгәннән соң ике көн узгач, аның телефонына «тикшерү комитетыннан» дип шалтыратканнар. Сөйләшү барышында алдау юлы белән зыян күрүченең кредит картасыннан билгесез исәпкә 200 мең сум акча күчерткәннәр.

Шуңа күрә очрашуда катнашучыларга билгесез номерларга җавап бирмәскә, бигрәк тә шәхси мәгълүматларны тапшырмаска һәм парольләрне әйтмәскә киңәш иттеләр.