Гомерләре дүрт стена артында гына үтми

Өлкәннәр музей директоры Радик Әхмәдиев һәм Али хәзрәт озатуында «Патриот» паркында һәм Турахан кә-шәнәсендә дә булдылар. Шулай ук районның җәмигъ мәчетенә һәм Успение чиркәвенә бардылар.

Район музееның, Хөсәенбәк исемендәге җәмигъ мәчет мәхәлләсенең һәм ветераннар советының берничә ел дәвамында приют карамагындагыларга шефлык итүен билгеләп үтик.

Экскурсиядән соң алар поселок кафеларының берсендә төшке аш ашадылар һәм килә алмыйча приютта калганнар өчен бүләкләр алып кайтып киттеләр.

Шөнгәккүл авылындагы «Иминлек» үзәге бүлекчәсе мөдире вазифаларын башкаручы Маргарита Кузьменко мондый экскурсиянең елга бер мәртәбә оештырылуын һәм картларга бик ошавын билгеләп үтте.

– Бик канәгать булып кайттылар. Кайда булуларын, нәрсәләр күрүләрен сөйләделәр. Хис-кичерешләре белән уртаклаштылар. Бүләкләр һәм күчтәнәчләр дә алып кайтканнар, аларны урамга чыгып һәм торып йөри алмаучыларга тараттык, – диде ул.