Чишмә районында укытучылар киңәшмәсе үтте

 «Мәгариф» гомумдәүләт проекты буенча 15 «Үсеш ноктасы» булдырылды, җиде мәктәптә «Цифрлы белем бирү мохите» ачылды. «Һәр баланың уңышы» проекты буенча навигатор системасында 82% бала теркәлде һәм белем алды, шулай ук өч авылда спортзал ремонтланды, физкультура һәм спорт белән шөгыльләнү өчен бер яссы корылма урнаштырылды. Алкин-2 авылы мәктәпләрендә һәм поселокның беренче мәктәбендә стоматология кабинетлары ачылды. Мәктәпләрне инициативалы бюджетлаштыру программасы хисабына һәркайсы 500әр мең сумлык дүрт проект тормышка ашырылды, Алкин-2 мәктәбе бу проектта ике тапкыр җиңү яулады.
Бүгенге көндә районда 36 белем бирү оешмасы: 22 мәктәп, 12 балалар бакчасы һәм ике өстәмә белем бирү учреждениесе эшли. Яңа 2024-2025 уку елында Чишмә мәктәпләрендә 5800 бала белем алачак, шуларның 508е – беренче сыйныф укучылары. 1777 бала мәктәпкәчә белем алачак. Балалар бакчаларына 3 яшькә кадәр 342 сабый чират көтә. Балалар булмау сәбәпле, 1 сентябрьгә Сәйран һәм Верхний хуторы авылларында ике филиал ябылды.
Мәгариф оешмаларында 655 педагог эшли, шуларның 193е – балалар бакчаларында, 412се – район мәктәпләрендә, 50се – өстәмә белем бирү өлкәсендә.
Мәгариф системасында эшләгән педагогларның 70 проценттан артыгы 35 яшьтән өлкәнрәк. Шунысы куанычлы, быел 11 яшь укытучы Чишмә районы мәктәпләрендә хезмәт эшчәнлеген башлый.