Полимер шнурлардан беләзекләр үрәләр

Бу эштә гимназия укучылары һәм педагоглары да читтә калмыйча актив катнаша.

Кызлар, технология укытучысы Лилия Байбәкова җитәкчелегендә, полимер шнурлардан һава-десант гаскәрләрендә парашютта кулланылучы беләзекләр үрү техникасына өйрәнделәр. Аларны ясаганда бер хәрәкәт белән беләзекне ачып, 5 метрга кадәр озынлыктагы ышанычлы трос ясарга мөмкинлек бирүче махсус үрү схемасы кулланыла. Ул солдатлар өчен файдалы һәм алыштыргысыз әйбер, алар аны һәрвакыт кулларында яки җиңел генә алып була торган урында йөртә ала.

Директорның тәрбия эше буенча киңәшчесе Светлана Әсәдуллина, сыйныф җитәкчеләре Светлана Никонорова һәм Минзилә Хисамова җитәкчелегендә 7 «А» һәм 7 «Б» сыйныф укучылары инициативасы белән окоп шәмнәре ясау акциясе оештырылды. Алдан ук парафин, балавыз сатып алынды, консерва банкалары һәм башка кирәкле әйберләр җыелды. Балалар катыргы кисеп банкалар эченә урнаштырдылар, аннары эретеп парафин салдылар, ул каткач өстенә балавыз койдылар һәм этикеткалар ябыштырдылар.

Окоп шәмнәре – ул тимер банкаларга тутырылган гофрокартонлы һәм парафинлы яндыргычлар. Алар кыр шартларында җылыну һәм ризык әзерләү өчен кулланыла. Мондый шәмнәр ярдәмендә азык-төлек җылытырга, су кайнатырга мөмкин. Окоп шәмнәре сигез сәгатькә кадәр янып тора ала.

Солдатларның, гаиләләре белән чәй эчүләрен искә алып, күңелләре күтәрелсен өчен һәр шәм янына шырпы тартмасы белән кәнфитләр дә салынды.

Укучылар яугирләрнең көнкүрешен җиңеләйтеп кенә калмыйча, аларга уңышлар һәм исән-сау килеш тизрәк җиңү белән өйгә кайтуларын теләп хатлар да язарга булдылар. Балалар кулы белән язылган, туган илдән килгән бу хатлар блиндажларда, кыр шартларында бигрәк тә кадерләп саклана.

Гимназия укытучылары сугышчылар өчен шулай ук «коры душ» җыелмалары да әзерләделәр. Бу су булмаган шартларда тәннең чисталыгын сакларга мөмкинлек бирүче заманча гигиена чаралары. Аны ясау өчен махсус губка – дорнит кулланыла, ул кечкенә кисәкләргә бүленә, махсус күбек сеңдерелә һәм пакетларга салына. Коры душ җыелмаларының бер өлеше Чишмәгә ялга кайткан яугиргә тапшырылды. Калган өлеше гумконвой белән җибәреләчәк.

Әнием элеккеге сыйныфташлары – 1990 елда Чишмә авылының 2-нче

урта мәктәбен тәмамлаучылар белән акча җыеп, Ярми Мәдәният йортына җыеп, аны маскировка челтәрләре ясау өчен тапшырулары турында сөйләде. Бу әйберләр авыл һәм район халкы ярдәмендә беренче ел гына җитештерелми.

Чишмә поселогында М. Шәйморатов исемендәге волонтерлар штабы оештырылган, битараф булмаган кешеләр анда гуманитар ярдәм – шәхси гигиена чаралары, юыну өчен кирәк-яраклар, өс һәм аяк киемнәре, чәй, кофе, шулай ук адреслы посылкалар китерәләр. Якын арада безнең районнан хәрби зонага чираттагы гуманитар йөк җибәрү планлаштырыла. Битараф кешеләр юк, һәркем илебез мәнфәгатьләрен яклаучы сугышчыларга ярдәм итүгә мөмкин кадәр күбрәк өлеш кертергә тырыша. Кемдер шәмнәр ясый, хатлар яза, хәйрия концертлары һәм акцияләре оештыра, кыр шартларында куллану өчен «коры душ» җыелмалары, төзелеш материаллары, техника сатып ала, хәрби операция өчен акча җибәрә. Ә башкалар үзләре гуманитар йөк илтеп тапшыра һәм конвой белән озата бара.

Без – укучылар, төрле түгәрәкләрдә, секцияләрдә тәрбияләнүчеләр, төрле тармак хезмәткәрләре, эшчеләр, җитәкчеләр, эшмәкәрләр, педагоглар, пенсионерлар, халыкның төрле яшьтәге һәм катламдагы вәкилләре шул рәвешле берләшәбез, һәм без бергә – көч!

Ярослав Максимов, гимназиянең 7 «А» сыйныф укучысы.