Сабыйларны китап белән кызыксындыру мөһим

Сер түгел, замана балаларына китап укуга караганда, күбрәк мультфильмнар һәм телетапшырулар карау һәм компьютер уеннары ошый.

Телефоннарыннан аерылмаган балаларны китап белән кызыксындырырга мөмкинме? Китап укуның да кызыклы икәнен төшендерә алсак, мөмкин, әлбәттә. Шуңа күрә әти-әниләргә киңәш: сабыйга кечкенәдән үк китаплар укырга кирәк.

Балалар бакчасының мәктәпкәчә төркемендә дә без бик күп кызыклы китаплар укыдык. Үз китапханәбез бар, ул даими рәвештә Ибраһим авылының  модульле китапханәсеннән алынган яңа китаплар белән тулыланып тора. Балалар күп кенә авторларның исемнәрен беләләр, китапларны тышына карап таныйлар. Укыганда бик теләп тыңлыйлар һәм ишеткәннәрен сөйләп бирә алалар. Аларга шулай ук әкиятләрне сәхнәләштерү дә ошый.

«Карлыгач» балалар бакчасында театр почмагы да оештырылган, биредә курчак театры күрсәтү өчен төрле зурлыктагы курчаклар бар. Күптән түгел рус халык әкиятен сәхнәләштердек. Безнең балалар персонажлар ролен башкарып кына калмадылар, үзләре дә андагы вакыйгалар белән җитәкчелек иттеләр, әкият барышын үзгәрттеләр. Шул рәвешле тәрбияви бурычлар хәл ителде: яхшылык, изгелек, үзара аңлашу, дуслык кебек әхлакый сыйфатларны бәяләргә өйрәнделәр.