Чишмәдә гөрләп ярминкә үтте

Бездә ярминкәләр һәрвакыт азык-төлекнең мул булуы белән аерылып тора, халыкның күңелен күтәреп җыр-моң яңгырый. Музей каршындагы зур мәйданда, район китапханәсенә кадәр, сәүдә рәтләре тезелеп киткән. Биредә фермерлар, хосусый малтабарлар һәм авыл халкы үз продукциясен тәкъдим итте.

Суык көндә сатып алучыларның битләре алланган,  кәефләре күтәренке. Ярминкәне оештыручылар сатучылар турында да хәстәрлек күргәннәр – «Туклану үзәге» җәмгыятеннән Нурия Миргалиева аларга вак бәлешләр, кәбестә һәм бәрәңге бөккәннәре тәкъдим итте. Җамал Камилов кайнар чәй ясап торды һәм камыр ризыклары сатты. Яңа ел алдыннан сатуга чыгарылган төрле ит ризыклары халыкның күңеленә хуш килде.

Сатып алучылар: «Койка ясау өчен аяк сатып алырга кирәк», «Бәлешкә түш ите алсак яхшырак булыр», дип киңәшләштеләр.

Ярминкәдә төрлесеннән ит бар иде. Мәсәлән, Калмаш авылыннан Ирек Байков 420 сумнан ат һәм сыер ите, 900–950 сумнан казылык, 280 сумнан бавыр һәм эчәк алып килгән. Аның янында  Игнатовка авылыннан Салават Бикбулатов 400 сумнан куян ите тәкъдим итеп тора иде.

– Аны күбесенчә өлкән яшьтәгеләр ала, чөнки ул диетик ризык, җиңел үзләштерелә һәм бик тәмле, – дип аңлатты ул.

Яңа ел табынын каз яки үрдәк итеннән башка күз алдына да китереп булмый. Шуңа күрә аларга ихтыяҗ зур булды. Чишмәлеләр һәм район кунаклары килограммын 450–500 сумнан каз, 350–400 сумнан үрдәк, 200–370 сумнан тавык һәм 450 сумнан күркә ите сатып алдылар. Мәсәлән, Әмин авылыннан Радик Хәбибуллин ярминкәгә 20 каз алып килгән иде.

– Пенсиядәбез, ел саен 50–60лап баш каз үстерәбез, үзебездән артканын сатабыз, – диде ул.

Ветеринария хезмәте сатуга чыгарылган барлык ит продукциясенең сыйфатын тикшерде. Ярминкәдә шулай ук бал, сөт ризыклары, көнбагыш мае һәм туңдырылган җиләк-җимеш, балык һәм башка авыл хуҗалыгы продукциясе тәкъдим ителде. Биредә шулай ук чыршы да сатып алырга мөмкин булды.

Чишмә элеваторы ярминкәдә сату өчен мал азыгы алып чыккан.

– Килограммын 15 сумнан арпа алып килдек, – диде Гүзәл Урманова.

Ярминкә булган көнне Киров урамындагы мәйданга машина белән керү тыелды.

– Капчыклап шикәр комы, ашлык, боты белән ит сатып алучыларны гына үткәрәбез. Бу тәртип һәм иминлек өчен эшләнә, – диделәр шлагбаум янында торучы «Ямь» МУПы хезмәткәрләре Сергей Сальников һәм Таир Кутлов.