Туризм һәм кунакчыллык индустриясе

Идел буе федераль округ төбәкләре дәүләт хакимиятенең закон чыгару органнары ассоциациясе утырышында туризм юнәлешләрен арытаба үстерү мәсьәләләре турында фикер алыштылар.

Рәсәй Президентының Идел буе федераль округындагы Тулы вәкаләтле вәкиле Игорь Комаров «Туризм һәм кунакчыллык индустриясе» дип аталган яңа гомумдәүләт проекты буенча эш башлау турында сөйләде. Аның төп максаты – Рәсәйдә барлык гражданнар, барыннан да элек, балалы гаиләләр өчен сыйфатлы һәм уңайлы ял урыннары булдыру.

Идел буе федераль округ турында сөйләсәк, округта үзенчәлекле табигый һәм рекреацион байлыклар, милли, дөньякүләм мәдәни һәм тарихи мирас объектлары бар. Ростуризм мәгълүматларына караганда, туризм тармагы 2,5 млн кешене эш белән тәэмин итә. Шул ук вакытта ил икътисадының 3,9 проценты бу өлкәгә туры килә, тулаем эчке продуктка керткән өлеш 3,7 триллион сум тәшкил итә.

– Кайбер төбәкләр проблемалар булганда һәм эпидемиологик чикләүләр кертелгәндә Идел буе федераль округындагы шәһәрләргә туристлар агымын арттыру өчен һөнәри һәм җаваплы эш иттеләр, – дип ассызыклады Игорь Комаров.

Һәр төбәк үз тәкъдимнәре белән җәлеп итә. Әйтик, Түбән Новгород өлкәсендә авыл туризмын үстерү турындагы закон беренче укылышта кабул ителде. Һәм бу юнәлеш һәр субъект өчен кызыклы булырга мөмкин.

Соль-Илецкида «Тозлы күлләр» бальнеологик курорт базасында «Тозлы күлләр «туристик-рекреация кластеры» инвестиция проекты тормышка ашырыла. Уртача алганда, курортка ел саен 1,3 миллионнан алып 1,5 миллионга кадәр Рәсәй һәм чит ил туристлары килә. Ә Ырынбур өлкәсенең «Ачыш офыклары» туристик маршруты «төбәкнең бренд маршруты» дәрәҗәсен алды.

– Соңгы вакытта экологик туризм актив үсә. 2020 елда Башкортстанның «Янган-Тау» геопаркы ЮНЕСКОның зур геопарклары исемлегенә кертелде. Бу Рәсәйдә һәм Бәйсез Дәүләтләр Бердәмлегендә халыкара танылу алган беренче геопарк, – диде Башкортстан Дәүләт җыелышы рәисе Константин Толкачев.

Вәкаләтле вәкил искәртеп узганча, туристик кешбэкның гамәлдә булуы ел ахырына кадәр озайтылды һәм гражданнарга 2021 елда җәйге лагерьларга барганда юллама бәясенең 50 процентын кире кайтару турында карар кабул ителде.

– Моннан тыш, Юлламада төбәкләргә ярдәм итүнең яңа коралы – инфраструктуралы бюджет кредитлары билгеләнгән, аны инвестицияләр рәвешендәге, шул исәптән туристик инфраструктура төзүне һәм яңартып коруны да кертеп, бер елга 3 процент ставка белән кимендә 15 елга алырга мөмкин, – дип билгеләп үтте Игорь Комаров.

Фото: https://pixabay.com/