Батырлар һәм кыюлар көне

Әлеге бәйрәм 1922 елның 23 февраленнән РСФСРда Кызыл армия һәм флоты көне буларак билгеләнә башлый. 1946 елдан 1993 елга кадәр без аны яратып, үз итеп Совет армиясе һәм Хәрби-диңгез флоты көне дип йөртә идек. СССР таркалганнан соң әлеге бәйрәм Ватанны саклаучылар көне буларак билгеләнә һәм 2002 елдан бирле бу көн ял көне санала.

23 февраль диюгә, күз алдына кыю ир-егетләр килеп баса. Ләкин Ватанны саклаучылар көне – аларныкы гына түгел, бөтен халык бәйрәме. Чөнки гомер-гомергә ата-бабаларыбыз илебезне саклаганнар, аның өчен кан койганнар, ә газиз әниләребез, әбиләребез аларның терәге, яшь буынны тәрбияләүче булганнар. Шуңа күрә бу көн һәр гаиләдә көтеп алына, олылап билгеләп үтелә.

Авыр сугыш елларында үзләренең интернациональ һәм патриотик бурычларын намус белән үтәгән хөрмәтле Бөек Ватан сугышы, хәрби хәрәкәтләр һәм хәрби хезмәт ветераннары, әтиләр, картәтиләр, безнең тынычлыкны саклап илебезнең төрле тарафларында хәрби хезмәттә булган, солдаттан кайткан һәм армиягә барачак егетләребез! Сезне чын күңелдән көч, түземлелек, мәрхәмәтлелек һәм туган җиргә карата мәхәббәт бәйрәме белән котлыйбыз! Сезгә һәм гаиләләрегезгә тыныч күк йөзе, ныклы сәламәтлек, күңел көрлеге, һәр эшегездә, укуыгызда зур уңышлар, шатлык-куанычлар һәм озын гомер телибез!

Туган илне саклау – ирләр эше,

Сез акларга тиеш өметне.
Мактау белән искә ала һәркем
Ил сакчысы дигән егетне…
Сез булганга имин булып ата таңнар,
Тыныч-матур тормыш белән үтә айлар.
Бәйрәмегез котлы булсын, ир-егетләр,
Мәңге тыныч, имин торсын җирләр-күкләр.

Фото: Tulpar.rbsmi.ru, Vk.com