Бәяләр артканны сизәсезме?

Беренче тәэсир: чыннан да, кайбер азык-төлеккә бәяләр кинәт арткан. Мәсәлән, «Табыш» кибетендә көнбагыш маеның бер шешәсе 110 сум тора иде.

– Элек май 84 сум иде, – дип раслый сатучы Оксана Тәбрисова. – Нигездә, бәяләр бу продуктка һәм йомыркага гына артты, элек аның бер дистәсе 55 сум тора иде, ә хәзер 7 сумга кыйммәтләнде. Ярмаларның бәясе дә күтәрелә, мәсәлән, карабодай элек 72 сум торган булса, хәзер – 76 сум. Элек йомырканы дистәләп алалар иде, ә хәзер берничәләп кенә алалар. Башка әйберләрнең хакы артмады, элеккечә калды.

«Монетка» һәм «Магнит» кибетләрендә дә бәяләрнең элеккеге дәрәҗәдә калуын расладылар.

– Миңа калса, ниндидер ыгы-зыгы өчен сәбәп юк. Кайчагында бәяләр якынча 90 тиенгә күтәрелә яки төшә. Товар белән тәэмин итүчеләрдән дә азык-төлек бәясен арттыру турында мәгълүмат килми, – дип билгеләп үтте «Магнит» кибетенең администраторы Олеся Хөснетдинова.

«Яшелчә һәм җимеш» кибетендә имбирьгә бәяләр күтәрелүен әйттеләр.

– Гадәттә, имбирь якынча 200 сум тора, әмма хәзер аның бер килограммының бәясе 420 сум. Калган азык-төлеккә бәяләр элекке дәрәҗәдә кала, – дип хәбәр итте сатучы Татьяна Кузнецова.